1 Փետրվար, Դշ, Առաջավորաց պահքի Գ օր

Գրքեր

Ուխտի Սուրբ Պատարագ՝ հանուն Հայոց երկրի ու պետականության անսասանության

Հունիսի 19-ին Հայաստանյայց Առաքելական Սուրբ եկեղեցին տոնախմբեց մեր հավատքի հայր և Հայոց առաջին հայրապետ Ս. Գրիգոր Լուսավորչի նշխարների գյուտի տոնը: Հայ եկեղեցու պատկառելի հայրապետն իր կենդանության օրոք Հայաստան աշխարհի Լուսատու և Լուսավորիչ հանդիսանալուց բացի, իր մահվամբ բնակակից է երկրի վրա՝ իր խնկելի նշխարներով, երկնքի մեջ՝ իր լուսեղեն հոգով, և հայի սրտի մեջ՝ իր անջնջելի հիշատակով:

Սուրբ մասունքներով հայտնի Զորավոր Ս. Աստվածածին եկեղեցին երկու տարի առաջ հարստացավ ևս մեկով. եկեղեցուն նվիրաբերվեց Ս. Գրիգոր Լուսավորչի մասունքակիր ճաճանչը և ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ՝ Զորավոր Ս. Աստվածածին եկեղեցու ուխտի օրերին համալրվեց ևս մեկը՝ Ս. Գրիգոր Լուսավորչի նշխարների գյուտի տոնը, որ դարձավ եկեղեցու հինգերորդ ուխտի օրը:

Տոնի օրը Զորավոր Ս. Աստվածածին եկեղեցում խորհրդակատար Տեր Վահան քահանա Առաքելյանն ուխտի Ս. Պատարագ մատուցեց՝ հանուն Հայոց ազգի ու եկեղեցու շինության ու պայծառության, հանուն Հայոց երկրի ու պետականության անսասանության:

Ս. Պատարագի ավարտից մինչ Երեկոյան ժամերգությունը հավատավոր հայորդիները, Ս. Գրիգոր Լուսավորչի բարեխոսությունը հայցելով, հաղորդակից դարձան առաքելաշավիղ հայրապետի մասունքակիր ճաճանչի օրհնությանը: Դեռևս առաջին դարից առաջին նորադարձները սրբերի հանդեպ իրենց հարգանքը մատուցել են աղոթքով ու սաղմոսերգությամբ, Սուրբ Պատարագին մասնակցությամբ և սրբերի օրինակի համաձայն՝ խոնարհության և հոգևոր սխրանքների մեջ առաջադիմելով, ինչը ցանկալի ու հաճելի է Աստծուն:

Սրբերի նշխարների հանդեպ եկեղեցու առանձնահատուկ երկյուղածության ու մեծարանքի վերաբերյալ Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանն ասաց. «Աստված միշտ հոգ է տանում Իր նվիրյալների մարմինների մասին, որպեսզի դրանք երբևէ չկորչեն, այլ արժանավայել պատվի արժանանան: Աստված է, որ հրաշագործ ու բուժիչ ուժով է օժտում այդ երանելիների մասունքներն ու մեծ փառքի արժանացնում: Չէ՞ որ հանուն արդարների է, որ Աստված մինչ այժմ խնայում է մեր այս մեղավոր աշխարհը: Սուրբ Գրիգոր Լուսավորիչ հայրապետի անդադար աղոթքները շարժեցին հայ ժողովրդի և Եկեղեցու հանդեպ Բարեգութ Երկնակալի ողորմածությունը, Աստծու կենարար լույսը սփռվեց հայոց հողի վրա, և փրկության հույսն ավետվեց ամենքիս, այսօր այս տոնի կապակցությամբ մենք էլ խնդրենք Սուրբ Գրիգոր Լուսավորչի բարեխոսությունը նախ՝ Հայոց աշխարհի խաղաղության ու բարգավաճման, այնուհետև՝ ամենքիս հոգևոր աճի համար»:

 

Կարինե Սուգիկյան

19.06.21
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․