Ո՞վ է մողեսից անմիտ

Մի անգամ մի շատ ուսյալ մարդ եկավ հայր Պաիսիոսի մոտ: Նա շատ գիտություններ էր ուսումնասիրել, բայց Աստծուն չէր հավատում: Նա հայր Պաիսիոսին ասաց.

- Ինձ համար դժվար է հավատալ, որ Աստված գոյություն ունի: Ես այնքան շատ բան գիտեմ և կարող եմ բացատրել, թե ինչու և ինչպես է ամեն ինչ կատարվում: Եվ ես չեմ կարող ընդունել այն, ինչ ասում ես Քրիստոսի մասին:

Ծերն ուշադրությամբ լսեց նրան ու ասաց.

- Իսկ դու մողեսից էլ անմիտ ես:

Գիտնականը խիստ վիրավորվեց և սկսեց առարկել: Բայց ծերն ասաց.

- Դու մողեսից անմիտ ես և ես դա կապացուցեմ քեզ:

Ծերի խցի մոտ մի ծանոթ մողես էր ապրում և նա կանչեց նրան: Մողեսը ծերի մոտ վազեց: Հայր Պաիսիոսը նրան հարցեց, թե կա՞ արդյոք Աստված: Այնժամ մողեսը բարձրացավ ետևի թաթերի վրա ու գլխով արեց:

Գիտնականը շվարեց ու արտասվեց: Իսկ ծերն ասաց.

- Այժմ տեսնո՞ւմ ես, որ մողեսից անմիտ ես: Նա գիտի, որ Աստված կա: Դու մարդ ես, բայց չես ուզում հասկանալ, որ Աստված գոյություն ունի:

Գիտնականը ծերի մոտից հուզված ու ցնցված հեռացավ:

Ռուսերենից թարգմանությունը՝ Էմիլիա Ապիցարյանի