«Պահեցողության այս մեծ շրջանի մեջ մուտք գործելով՝ մի յուրատեսակ ուխտ ենք կապում ինքներս մեզ հետ՝ ոչ միայն մարմնի, այլ առավել հոգու պահեցողության մեջ մտնելու համար: Մեր կյանքի կարևորագույն այս հերթական շրջանը հորդորում է անխախտ մնալ մեր միջի մեղավոր մարդուն մեռցնելու և փոխարենը Կյանքի ջրի աղբյուրին՝ Հիսուս Քրիստոսին, ապրեցնելու մեր որոշման մեջ: Աղոթքների, պահեցողության, ապաշխարության և բարի գործերի միջոցով սրբելու, մաքրելու մեր հոգիները մեղքերի աղտեղությունից՝ մեր հոգու աչքերի առաջ ունենալով խաչի վրա հեղված Փրկչի մաքրագործ արյունը, որ մեզ համար բաց արեց դեպի կորուսյալ դրախտ տանող ճանապարհը»,- ասաց Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը:
Պահեցողության յուրատեսակ ուխտին հավատարիմ՝ Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, շարունակում է սոցիալական ծրագրերի իր շարքը: Մարտի 1-ին, Զորավոր Ս. Աստվածածին եկեղեցում, Տեր Գրիգորը Լիլիթ Խեկոյանին (34 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Լիլիթն իր երկու անչափահաս երեխաների հետ վարձակալությամբ է ապրում Էջմիածին քաղաքի Մաշտոց փողոցի 61/10 հասցեում: Նա յոթ տարի է, ինչ ամուսնալուծվել է, և ամուսինը նյութական աջակցություն չի բերում իր նախկին կնոջն ու երեխաներին: Ընտանիքի մայրը մեծ դժվարության առջև է կանգնած. նա երրորդ խմբի հաշմանդամ է, տեսողության հետ կապված խնդիր ունի: Լիլիթը նշեց, որ բարի մարդկանց օգնության շնորհիվ աչքի վիրահատություն է անցել, բայց դեռ ապաքինման փուլում է և չի կարողանում աշխատել:
«Ընտանեկան նպաստի և թոշակի գումարները չեն բավարարում մեր կարիքները հոգալու համար: Մեզ օգնության ձեռք են մեկնել Մայր Աթոռ Սուրբ Էջմիածնի սոցիալական ծառայության գրասենյակը և դպրոցը, ուր սովորում են երեխաներս: Անչափ շնորհակալ եմ նաև Զորավոր Ս. Աստվածածին եկեղեցու համայնքից, հոգևոր հովվից և աջակից անձից այն ուշադրության համար, որ ցուցաբերեցին ընտանիքիս հանդեպ»,- ասաց Լիլիթը:
Կարինե Սուգիկյան
Զորավոր Սուրբ Աստվածածին եկեղեցի