Տիրոջ կողմից մարդ արարածին շնորհված բազմաթիվ պարգևներից մեկը աստվածատուր այն հողակտորն է՝ երկրային հայրենիքը, որտեղ մարդն ապրում է ժամանակավոր իր կյանքը: Քրիստոս Իր փրկագործության շնորհիվ մարդուն հնարավորություն տվեց նաև երկնային հայրենիք ունենալու: Աստծու պարգևը՝ երկրային հայրենիքը, գնահատողը, պահպանողն ու շենացնողը, Աստծուն և իր հայրենակցին սիրող անձը երկնային մնայուն հայրենիք ունենալու պատվին է արժանանալու: Մեր Տերն այս մասին ասել է. «Եթե աշխարհիկ հարստությունը գործածելու մեջ հավատարիմ չեղաք, ճշմարիտ հարստությունը ո՞վ կվստահի ձեզ: Այսինքն, եթե հավատարիմ չեղաք աշխարհիկ հարստությանը, որը ձերը չէ, ինչպե՞ս եք ուզում, որ Աստված ձեզ տա ձեզ սպասող ճշմարիտ հարստությունը» (Ղուկ. 16:11-13):
Հայրենասեր քրիստոնյայի համար իր հայրենիքի վիշտն ու ուրախությունը իր վիշտն է և ուրախությունը, ուստի նրա շուրթերից հանապազորդ հնչում են աղոթքներ՝ հանուն հայրենիքի և հայրենյաց պաշտպանի: Ապրիլի 15-ին Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, մեկնեց ուխտագնացության՝ Տիրոջը վերառաքելով աղոթքներ՝ հանուն հայրենիքի և հայրենյաց պաշտպանի: Աղոթքով հարուստ համայնքի ուխտի ուղին նրանց առաջնորդեց դեպի Դաշտադեմի սբ. Սարգիս եկեղեցի, այնուհետև Գյումրու չորս սրբավայրեր՝ սբ. Ամենափրկիչ, սբ. Աստվածածին (Յոթ Վերք), սբ. Նշան և սբ. Գրիգոր Լուսավորիչ: Ս. Ամենափրկիչ եկեղեցում ուխտավորները մասնակից եղան Երեկոյան ժամերգությանը: Սիրո ճաշով եզրափակվեց Զորավոր Ս. Աստվածածին եկեղեցու համայնքի ուխտի ուղին:
«Քիչ բանի մեջ հավատարիմը շատի մեջ էլ հավատարիմ է, իսկ քչի մեջ անիրավը, շատի մեջ էլ անիրավ է» (Ղուկ. 16.10): Տերն ուսուցանում է, որ նա, ով հավատարիմ է քչի մեջ, այսինքն՝ կարողացել է աստվածահաճո կերպով տնօրինել այս աշխարհում իրեն վստահված ունեցվածքը, ապագայում արժանի կլինի ճշմարիտ հարստությանը: Երկրային հարստությունն անվանել է փոքր, քանի որ այն իսկապես փոքր է, աննշան և անցողիկ՝ ի համեմատություն երկնայինի, որ մնայուն է: Եթե մարդ անհավատարիմ է եղել երկրային հարստությանը, չտնօրինելով այն, ինչպես հարկն է, այսինքն՝ ի շահ հոգու, ապա ինչպե՞ս կարող է արժանի լինել, որ վստահեն իրեն հոգևոր հարստությունը:
Կարինե Սուգիկյան
Զորավոր Սուրբ Աստվածածին եկեղեցի