Քրիստոնյան իր ողջ կյանքի ընթացքում ջանում է ընթանալ Տիրոջ ուղենշած ճանապարհով՝ ձգտելով աստվածնմանության: Քրիստոսի հետևորդներն առաջին դարից ի վեր անձամբ չեն ճանաչել Քրիստոսին, բայց հնարավորություն են ունեցել կարդալ Նրա խոսքը Ավետարաններից, որ վկայել են Նրա ներկայությունն ու խոսքը վայելած առաքյալներն ու աշակերտները: Դարեր շարունակ յուրաքանչյուր քրիստոնյա հանդիպել է Քրիստոսին իր հոգևոր ճամփորդության ընթացքում, ճանաչել Նրան՝ ոչ միայն Նրա ուսմունքը լսելով կամ կարդալով, այլ իր հոգուց և սրտից ներս վայելելով Նրա կենդարար ներկայությունը: Դարեր շարունակ Քրիստոսի հետևորդներն իրենց հոգևոր ընթացքը նորոգել ու նորոգում են ուխտի ճանապարհներով:
Հոկտեմբերի 4-ին Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, հերթական հոգենորոգ ուղին անցավ՝ ուխտի մեկնելով Սյունյաց թեմի սրբավայրեր: Առաջին սրբավայրը, ուր այցելեցին ուխտավորները, Սյունաց աշխարհի նշանավոր վանքերից Որոտնավանքն էր: Վանական համալիրի հնագույն եկեղեցին Ս․ Գրիգոր եկեղեցին է, որն ըստ պատմիչ Ստեփանոս Օրբելյանի՝ 4-րդ դարում հիմնադրել է սբ. Գրիգոր Լուսավորիչը: Վանքի մյուս Ս. Ստեփանոս, Ս. Կարապետ եկեղեցիները կառուցվել են 11-րդ դարում:
Ուխտավորներին ողջունեց և բարեմաղթանքի ու օրհնության խոսքեր ասաց վանքի հոգևոր հովիվ Տեր Դավիթ քահանա Գիշյանը, ապա Տեր Հայրը ներկայացրեց վանքի բազմադարյան պատմությունը: Համայնքը Տեր Դավիթի գլխավորությամբ մասնակցեց Ճաշու ժամերգությանը և հայցեց օրվա հիշատակելի սրբերի՝ Քրիստոսի յոթանասուներկու աշակերտների բարեխոսությունը: Ապա Տեր Հոր առաջնորդությամբ ուխտավորները մեկնեցին Դարբաս գյուղի Ս. Ստեփանոս եկեղեցի, ուր միասնական աղոթք հնչեցրին առ Տեր՝ Հայոց ազգի ու եկեղեցու պահպանության և շինության համար: Այնուհետև համայնքը համախմբվեց սիրո ճաշի և հոգևոր զրույցի շուրջ, ապա հոգեպես զորացած վերադարձավ Երևան:
Եկեղեցու հայրերից Պավել պատրիարքն ասել է. «Թռչունը նրա համար է թռչուն, որ թռչում է: Եվ ծաղիկը նրա համար է ծաղիկ, որ բուրումնավետ է և ծաղկում է: Եվ մարդը նրա համար է մարդ, որ աղոթում է»:
Կարինե Սուգիկյան
Զորավոր Սուրբ Աստվածածին եկեղեցի