Գրքեր

Սաղմոս ՃԺԱ

Ալելուիա. Անգեի և Զաքարիայի ապաշխարության վրա: Սա ևս օրհնություն է առաջինի նման, որ հորդորում է Աստծու երկյուղն [ունենալ], այստեղ նույնպես խոսում է քաղցրության, երկյուղի և ողորմության մասին՝ խոստանալով մարմնավոր և հոգևոր վարձք, որը և հերթով կուսուցանենք:

1. Երանեալ է այր, որ երկնչի ի Տեառնէ. զպատուիրանս նորա նա կամի յոյժ:

Երանի այն մարդուն, որ վախենում է Տիրոջից, և խիստ կամեցող է նրա պատվիրանների:

Քանզի յուրաքանչյուր մարդ Տիրոջ երկյուղով խորշում է չարից: Խիստ կամեցող է նրա պատվիրանների. Աստծուն մոտ տեսնելով՝ խիստ կամենում է հաճո լինել [նրան]:

2. Հզօր եղիցի յերկրի զաւակ նորա. և ազգ ուղղոց օրհնեսցի:

Նրա սերունդը հզոր կլինի երկրի վրա, և ուղղամիտների ազգը կօրհնվի:

Ինչպես Աբրահամով, որի զավակը ճեղքեց ծովը և գետը վեր բարձրացրեց, և կարգեց արեգակը, լուսինն ու աստղերը: Եվ ուղղամիտների ազգը կօրհնվի՝ ճշմարիտ հավատացողների:

3. Փառք և մեծութիւն են ի տան նորա, արդարութիւն նորա մնայ յաւիտեանս յաւիտենից:

Փառք և հարստություն կլինի նրա տան մեջ, նրա արդարությունը կմնա հավիտյանս հավիտենից:

Անկատարներին էր սա վայել, իսկ կատարյալներին Տերը խաչ խոստացավ: Փառք և հարստություն ունեցավ Դավթի որդին՝ Սողոմոնը, իսկ արդարությունը գալով հարեց Քրիստոսին և նրան հավատացողներին:

4. Ծագեաց ի խաւարի լոյս ուղղոց. ողորմած գթած եւ արդար է Տէր:

Արդարների համար լույս ծագեց խավարում. ողորմած, գթասիրտ և արդար է Տերը:

Խոսքը պատշաճում է Եզեկիային՝ ասորեստանցիների կործանման առիթով, որի ժամանակ մեծ լույս ծագեց, որն արդար էր: Անգիտության խավարում ծագեց գիտության լույսը, որը շատերին ցույց տվեց՝ Հովսեփին, Դանիելին, Հռութին, Եսթերին, որոնք արդար էին: Նորից՝ թողեց սրբերին խավարում նեղության մեջ, որպեսզի ցույց տա նրանց քաջությունը, ինչպես Հոբին: Ողորմած, գթասիրտ և արդար է ողորմածների, գթասիրտների և արդարների [հանդեպ]:

5. Քաղցր այր՝ ողորմի և տայ փոխ, յօրինէ զբան իւր ի դատաստանի, զի յաւիտեան նա մի սասանեսցի:

Բարի մարդը ողորմած է և փոխ է տալիս, խոսքն իր կատարում արդարությամբ, որպեսզի հավետ նա չսասանվի:

Սիմաքոսն ասում է՝ բարի մարդը շնորհող է և փոխ տվող, և ինչպես առակն է ասում. «Աղքատին ողորմություն տվողը փոխ է տալիս Աստծուն» (Առակ 19:17), և սա հայտնի է, քանզի Հիսուսը բարեհաճ այր է, փոխ տվեց քանքարը և տոկոսներով է պահանջում, իսկ ողորմածը զգուշանում է չսասանվել Տիրոջ խոսքից, որպեսզի իր խոսքերով չդատապարվի (տե՛ս Մատթ. 12:37):

6. Յիշատակ յաւիտենից եղիցի արդարն. ի համբաւէ չարէ նա մի՛ երկիցէ:

Չար լուրից նա չի վախենա, նրա սիրտը պատրաստ է հույս դնելու Աստծու վրա:

Արձանագրելով Աստծու անմոռաց սերն ու պատվիրանները, ոմանք տեսան և հետո հիշեցին նրա փառքը, ինչպես Եզեկիան և բոլոր սրբերը: Չար լուրից նա չի վախենա՝ Սենեքերիմի սպառնալիքներից, և նրանից, որ ասում է. «Ո՞վ պիտի պատմի ձեզ, թե կրակը բորբոքվել է» (Ես. 33:14), աչքերի լացի և այլ բաների մասին, քանզի պսակի ակնկալիք ունի, այլ ոչ թե տանջանքների:

7. Պատրաստ է սիրտ նորա յուսալ առ Աստուած:

Նրա սիրտը պատրաստ է հույս դնելու Աստծու վրա:

Սիմաքոսը [թարգմանում է]՝ «Անդրդվելի է նրա սիրտը հույսի մեջ», ըստ Պողոսի. «Եվ հիմա ինձ է սպասում արդարության պսակը» (Բ. Տիմ. 4:8):

8. Հաստատեալ է սիրտ նորա. և նա մի՛ երկիցէ մինչև տեսցէ ի թշնամիս իւր:

Հաստատուն է սիրտը նրա և չի սոսկա, մինչև իր թշնամիների վերջը չտեսնի:

Անսասան հավատով հաստատված այս կյանքում այլևս ոչնչի մասին չէր խորհում, բացի իր թշնամիներից:

9 Սփռեաց և ետ աղքատաց. արդարութիւն նորա մնայ յաիւտեանս յաւիտենից. և եղջիւր նորա բարձր եղիցի փառօք:

Բաժանեց նա ու տվեց աղքատներին. նրա արդարությունը կմնա հավիտյանս հավիտենից, և նրա եղջյուրը բարձր կլինի փառքով:

Սերմի պես է ողորմությունը, որ մատների միջոցով տարածվելով ցանվում է և բազմապատիկ պտուղներ առնում, և թեև տրված իրն ապականվում է, սակայն արդարությունը մնում է հավիտյանս հավիտենից: Եվ նրա եղջյուրը բարձր կլինի փառքով, պսակն է՝ գլխի վրա դրված ինչպես կենդանիների գլխի եղջյուրը, քանզի ասում է. «Ողորմությունը բարձրագլուխ պարծենում է դատաստանի դիմաց» (Հակոբ. 2:13):

10. Մեղաւորն տեսցէ և բարկասցի. զատամունս իւր կրճտեսցէ, և հալեսցի. և ցանկութիւն մեղաւորաց կորիցէ:

Մեղավորը տեսնելով՝ կբարկանա, կկրճտեցնի իր ատամներն ու հալումաշ կլինի, և մեղավորների ցանկությունը կկորչի:

Կտեսնի սատանան և կբարկանա, և ոչինչ չի կարողանա անել, այլ միայն վաստակել աչքերի լաց և ատամների կրճտոց, ու հալումաշ կլինի կիզիչ բոցի մեջ: Նաև բոլոր անողորմները, ինչպես մեծատունը, և մեղավորների ցանկությունը կկորչի. սատանայի ցանկությունն էր՝ իր հետ կործանել Ադամին, ինչպես նաև հիմար կույսերի և հարուստի հանգիստը կկորչի, քանզի չշահեցին ոչինչ: Բոլոր մեղավորների ցանկությունները պիտի չարդարանան:

 

Վարդան ԱրևելցիՄեկնութիւն Սաղմոսացն ԴաւթիԷջմիածին, 1797 թ.

Գրաբարից թարգմանեց Գայանե Թերզյանը

30.09.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․