Սաղմոս Ի

Ի կատարած. Սաղմոս Դավթի, երբ հիվանդացավ Եզեկիան և ոտքի կանգնեց հիվանդությունից, կատարվեց այս սաղմոսի մարգարեությունը: Նաև բանական միտքը գրքերում թագավոր է կոչվում:

1. Տէր ի զօրութեան քում ուրա՛խ եղիցի թագաւորն. ի փրկութեան քում ցնծասցէ յոյժ:

Տե՛ր, զորությամբ քո պիտի ուրախանա թագավորը, և հույժ ցնծա քո փրկությամբ:

Եզեկիան հույժ ուրախացավ, և [մարդու] միտքն էլ ցնծում է, երբ նմանվում է Աստծուն:

2. Զցանկութիւն սրտի նորա ետուր նմա. և զկամս շրթանց նորա ոչ արգելեր ի նմանէ:

Նրա սրտի ուզածը տվեցիր նրան և նրա շրթունքների ցանկությունը չմերժեցիր:

Ասում է, թե որդի խնդրեց և տրվեց Մանասեին:

3. Ժաման արարեր զնա յօրհնութիւն քաղցրութեան քոց. և եդիր ի գլուխ նորա պսակ ի քարէ պատուականէ:

Քո քաղցր օրհնությամբ այցելեցիր նրան և թանկագին քարերով ընդելուզված պսակ դրիր նրա գլխին:

Հասցրեցիր, արժանացրեցիր այսպիսի օրհնությունների, քանզի Որդու՝ քաղցր պտղի միջոցով և թագավորության թանկագին քարերով պսակեցիր նրան:

4. Կեանս խնդրեաց ի քէն. և ետուր նմա ընդ երկայն աւուրս՝ յաւիտեանս յաւիտենից:

Կյանք խնդրեց քեզնից, և նրան տվիր երկար օրեր՝ հավիտյանս հավիտենից:

Տասնհինգ տարի տվեց Եզեկիային և միտք, որն անմահ է: Եվ նախաստեղծներն իրենց մտքի պատճառով անգիտաբար աստվածանալ ցանկանալով, չուրախացան, սակայն այդ ժամանակ Աստված ելավ, ինքը մարդացավ՝ աստվածացնելու համար մեր բնությունը: Երկար օրեր. մտքին է տրված Աստծո հետ միավորվել, այլ ոչ թե Եզեկիային:

5. Մեծ են փառք նորա ի փրկութեան քում զփառս և զմեծ վայելչութիւն դիցես ի վերայ նորա:

Մեծ է նրա փառքը քեզնից եղած փրկությամբ, փառք ու պարծանք կդնես նրա վրա:

Կյանքի համար՝ փառք ու պատիվ, քանզի մարդ դարձավ Արեգակը և Բաբելոնից նրա համար ընծաներ բերեցին: Եվ Քրիստոսով է մեր փառքը:

6. Տացես զնա յօրհնութիւն յաւիտեանս յաւիտենից. և ուրա՛խ արասցես զնա յուրախութիւն երեսաց քոց:

Օրհնության մեջ կհաստատես նրան հավիտյանս հավիտենից, կուրախացնես նրան քո երեսի խնդությամբ:

Եզեկիայի պես ասենք. թող օրհնի քեզ Աստված: Եվ Հայրն էլ հավիտենական օրհնություն տվեց իր Որդուն և նրա անդամներին: Երբ եկեղեցին երևա Հոր առջև [կուրախացնի իր երեսի խնդությամբ], այստեղ ևս կուրախացնի բոլոր նրանց, ովքեր սուրբ սիրտ ունեն:

7. Թագաւոր յուսացաւ ի Տէր, յողորմութենէ բարձրելոյն նա մի՛ սասանեսցի:

Թագավորն իր հույսը դրեց Տիրոջ վրա, և Բարձրյալի ողորմությամբ նա չի սասանվի:

Նկատի ունի Եզեկիային, ինչպես նաև հստակ միտքը, որ հոգու և մարմնի հետ չի շրջում, այլ՝ Տիրոջ ողորմության շնորհիվ ըստ խղճմտանքի է դատում հոգուն, մինչև որ սփաթվի և ինքն էլ անսասան է մնում:

8. Գտցի ձեռն քո ի վերայ թշնամեաց քոց. և աջ քո գտցէ զամենայն ատելիս քո:

Թող ձեռքդ անպակաս լինի քո թշնամիների վրա, և աջդ հասնի բոլոր քեզ ատողներին:

Եզեկիա թագավորը հոգով աղոթեց, քանզի մտքով և շարժմամբ տրվել էր աղտեղություններին ու դիվական գործերին: Իսկ աջդ թող գտնի. երբ ձախը միաբանվում է աջի հետ, գտնում է բոլոր թշնամիներին և զգուշանում, կամ՝ չի հնազանդվում նրանց, այլ՝ կռվում է և հաղթում: Դարձյալ Հիսուսի աջը խաչի միջոցով մարդկային ազգին, որ մեղքի պատճառով թշնամացավ և կորստյան մատնվեց, նորից գտնում է որպես մոլորյալ ոչխարի՝ մեր ձախը աջ դարձնելով, իսկ ատելիներին՝ սիրելի:

9. Դիցես զնոսա որպէս հնոց ի հուր՝ ի ժամանակի երեսաց քոց:

Երբ դու երևաս, նրանց հրաբորբոք հնոց կդարձնես:

Նրանք, ովքեր ուրիշների համար հնոցում այրվելու և կորստյան մատնվելու պատճառ եղան, այսինքն՝ դևերը, հեթանոսներն ու չարերը, ապա երկրորդ գալստյան ժամանակ, երբ Տերը երևա իր բարկությամբ, նրանք պիտի այրվեն գեհենի հնոցներում:

10. Տէր բարկութեամբ իւրով խռովեցուսցէ զնոսա. և հուր կերիցէ զնոսա:

Տերն իր զայրույթով կխռովի նրանց, և հուրը նրանց կլափի:

Քանզի Աստծո բարկությունը հրի միջոցով է հայտնի դառնալու:

11. Պտուղ նոցա յերկրէ կորիցէ, և զաւակ նոցա յորդւոց ի մարդկանէ:

Երկրից կկորչի պտուղը նրանց, իսկ մարդկանց որդիներից՝ սերունդը նրանց:

Այսինքն՝ կենդանիների երկրից նրանց ամոթալի գործերը, որոնց պտուղն այստեղ է և նրանց որդիները չեն կոչվում մարդկանց որդիներ, այլ՝ սատանայի:

12. Խոտորեցան ի քէն չարութեամբ. խորհեցան խորհուրդ, զոր ոչ կարասցէն հաստատել:

Չարամտությամբ խոտորվեցին քեզնից, դավեր նյութեցին, բայց չեն կարող իրագործել դրանք:

Դևերը չարությամբ և հպարտությամբ մտածեցին տիրել մարդկանց հավիտյանս:

13. Արասցես զնոսա հալածեալս. ի մնացուածս քո պատրաստեսցես զերեսս նոցա:

Դու նրանց հալածական կանես, և նրանց երեսը կուղղես քո հավատարիմների կողմը:

Երբ նրանց ասի, թե գնացեք դեպի հավիտենական հուրը: Քո հավատարիմների կողմը. ինչպես որ Սենեքերիմի զորքը Երուսաղեմում կոտորվեց և ինքն էլ, որ պատրաստվում էր տուն գնալ, Տիրոջ բարկությունը վրա հասավ նրան և սպանվեց իր որդիների ձեռքով: Նույնպես նաև սատանան որոշ չափով Քրիստոսի և սրբերի կողմից այստեղ տանջվեց, իսկ Տիրոջ բարկության հիմնական մասը կրելու է այնտեղ, որտեղ մրուրը չի պակասի (Սղմ. 74:10):

14. Բարձր լեր Տէր ի զօրութեան քում. օրհնեսցուք, և սաղմոս ասասցուք զօրութեանց քոց:

Բա՛րձր եղիր, Տե՛ր, քո զորությամբ. օրհնենք և սաղմոս երգենք քո զորությանը:

Զորությունը Տիրոջ կատարած հրաշագործությունների մեջ է, որի շնորհիվ մեծանում է նրա փառքը: Օրհնենք և սաղմոս երգենք նրա զորությանը: Նորից բա՛րձր եղիր խաչի վրա և երկնքում, քանզի բոլորին դեպի քեզ կկանչես օրհներգությամբ և սաղմոսով:

 

 

 

Վարդան Արևելցի, Մեկնութիւն Սաղմոսացն Դաւթի, Էջմիածին, 1797 թ.

Գրաբարից թարգմանեց Գայանե Թերզյանը