Շնորհավոր մեր մեծ ընտանիքի լավագույն բարեկամ Կարեն Վարդանյանի ծննդյան տարեդարձը

Զորավոր Ս. Աստվածածին եկեղեցու համայնքը, հոգևոր դասը և արև երեխաները, եկեղեցու հոգևոր հովիվ Տեր Գրիգոր քահանա Գրիգորյանի գլխավորությամբ, շնորհավորում են եկեղեցու սոցիալական ծրագրերի մշտական աջակից, ամերիկաբնակ Կարեն Վարդանյանի ծննդյան տարեդարձը: «Փա՜ռք Բարձրյալին, Ում նախախնամությամբ արդեն մի քանի տարի է, ինչ Զորավոր Ս. Աստվածածին եկեղեցու մեծ ընտանիքը բարեկամացել է Կարեն Վարդանյանի հետ: Գոհությո՜ւն Աստծուն, որ մեզ պարգևել է ազգանվեր ու եկեղեցանվեր Ձեզ պես զավակ, որ երկար տարիներ ապրելով հայրենիքից հեռու՝ միշտ մնացել եք հարազատ զավակն ազգի ու Մայր եկեղեցու: Ջերմորեն շնորհավորում ենք Ձեր ծննդյան տարեդարձի առթիվ, սիրելի՛ Կարեն, մաղթում քաջառողջ կյանքի երկար տարիներ և աղոթում Ամենակալին, որպեսզի Իր անսպառ օրհնությանն ու ողորմությանն արժանացնի Ձեզ և Ձեր ընտանիքին»,- իր շնորհավորական խոսքում ասաց Տեր Գրիգորը:

Քսան տարի է, որ Կարեն Վարդանյանը բնակություն է հաստատել ԱՄՆ-ի Լոս Անջելես քաղաքում: Մինչ ԱՄՆ մեկնելը էջմիածնաբնակ մեր հայրենակիցը երեք տարի անդամակցել է Հայ Առաքելական եկեղեցու առաջին երիտասարդաց միության Էջմիածնի մասնաճյուղին, ապա ուսանել Գևորգյան հոգևոր ճեմարանում: Հոգևոր ծառայության իր ուղին շարունակելով հայրենիքից հեռու՝ ԱՄՆ-ի Արևմտյան թեմի առաջնորդ Տ. Հովնան արք. Տերտերյանի ձեռամբ ձեռնադրվել է սարկավագ և այժմ ծառայում է Լոս Անջելեսի առաջնորդանիստ Սրբոց Ղևոնդյանց Մայր տաճարում: Տիրոջ կենսատու խոսքերը նրա սրտում դեռ մանկուց արմատավորվելով և սիրո ու հոգատարություն ներքո աճելով՝ պտղաբերել ու պտղաբերում են ի փառս Աստծու: Հայրենիքից հեռու, բայց հանուն հայրենիքի ու մայր եկեղեցու է ապրում ու գործում մեր հայրենակիցը: 2016 թ.-ից առ այսօր, Զորավոր Ս. Աստվածածին եկեղեցու սոցիալական ծրագրերի շրջանակում, Կարեն Վարդանյանի աջակցությամբ Երևանում և Հայաստանի տարբեր մարզերում բնակվող շուրջ 270 կարիքավոր ընտանիքի տրվել է դրամական աջակցություն, սննդի ու քաղցրավենիքի փաթեթներ, անկողնու և հիգիենայի պարագաներ: Աջակցություն է ցուցաբերվել նաև զոհված ազատամարտիկների ու զինվորների, Դաունի համախտանիշ ունեցող երեխաների և սիրիահայ ընտանիքների: Նա իր մասնակցությունն է ունեցել նաև ապրիլյան պատերազմին Հայոց բանակին աջակցելու հայրենանվեր գործում: Նրա նախաձեռնությամբ և հովանավորությամբ Էջմիածին քաղաքից և հարակից գյուղերից «Հայ միասնության խաչ»-ի Արվեստաց դպրոց հաճախող 46 հաշմանդամ և 400 անապահով ընտանիքի երեխաներ մասնակցել են ամանորյա և երեխաների պաշտպանության միջազգային օրվան նվիրված տոնական միջոցառումների: Կարեն Վարդանյանը «Արև-երեխաներ» ՀԿ-ի մշտական աջակիցներից է, որ կազմակերպության հիմնադրման օրից դարձել է արև երեխաների լավագույն բարեկամը:

Մարդը չի արարվել միայն իր համար, այլ արարվել է բարին արարելու, սիրո, հավատարմության, ճշմարտության, ողորմության, քաջության, հայրենիքի և եկեղեցու բազմատեսակ կարիքների ծառայության համար: Մեր հայրենակից Կարեն Վարդանյանի հայրենանվեր և եկեղեցանվեր ծառայության ուղին շատ լայն է. նա մասնակցել է Էջմիածնի Մայր տաճարի հիմնանորոգության և բարեզարդության համար կազմակերպված համազգային հանգանակությանը, աջակցել է ուսանողների, որոնք դժվարացել են իրենց ուսման վարձերը վճարել, աշխատատեղեր է ապահովել գործազուրկ հայրենակիցների համար: Անցյալ տարի նրա աջակցությամբ «Իմ ուղին» ուսումնա-վերականգնողական մասնագիտական ուսուցման ցերեկային կենտրոնի երկրորդ մասնաշենքի ադապտիվ ֆիզիկական կուլտուրայի դասասենյակն ու Գևորգյան հոգևոր ճեմարանի մարզադահլիճը համալրվեցին բարձրակարգ սպորտային մարզասարքերով: Համավարակի այս օրերին նա շտապել է իր աջակցությունը բերելու հայրենիքին՝ տրամադրելով պրոֆեսիոնալ բժշկական արտահագուստ, հակամանրէային ախտահանիչներ, հեռավար ջերմաչափեր: Նրա միջնորդությամբ և աջակցությամբ Էջմիածնի հիվանդանոցի սարքավորումները համալրվել են ռենտգեն հետազոտության ապարատով:

Ամեն անգամ աստվածաշնչյան «Երանելի է մանավանդ տալը, քան առնելը» (Գործք Առ. 20:35) պատգամը կյանքի կոչելը երջանկություն է պարգևում Կարեն Վարդանյանին, քանի որ նա երջանկության աղբյուրը սիրո և ողորմածության առաքինությունների մեջ է բացահայտել: «Ես ամենուր զգում եմ Աստծու ներկայությունը: Առանց Աստծու ոչինչ անել չեմ կարող, ինչ ստեղծել եմ և ինչ ունեմ, Նրա շնորհիվ է: Կյանքիս ուղիղ կեսն ապրում եմ ԱՄՆ-ում, սակայն ինձ երբեք սփյուռքահայ չեմ համարել: Հայրենիքից հեռու ապրելն ինձ սովորեցրեց առավել նվիրվել հայրենիքին, անշահախնդիր ու առանց սեփական շահի սիրել հայրենիքը»,- ասում է Կարեն Վարդանյանն ու նույն ոգով դաստիարակում իր երկու որդիներին: Նրա համար կարևոր է, որ իր զավակները գիտելիքներ ամբարեն, որպեսզի դրանք միջոց դառնան՝ բարին գործելու:

Հանուն հայրենիքի և հայ եկեղեցու շենացման ու զորացման համար արված յուրաքանչյուր աստվածահաճո գործ մի քայլ է, որ իր հետքն է թողնում մեր պատմության մեջ: «Եթե մեր ժողովրդի մեջ չգտնվի հոսանքն ի վեր թիավարելու կամքով ամրացած անձերի անշահախնդիր և ինքնանվեր կորիզը, մեր Հայ կյանքը կգնա ու կխառնվի աշխարհի կյանքի ծովի մեջ, ուր գետերի ջրերը այլևս չեն զանազանվի…»,- ասել է երջանկահիշատակ Գարեգին Ա կաթողիկոսը:

Կարինե Սուգիկյան