Սիրեցե՛ք միմյանց

Մինչ այս խոսքերը հնչեցնելը, Տերն Իր առաքյալներին ասաց՝ մի նոր պատվիրան եմ տալիս ձեզ: Ինչպես Ես ձեզ սիրեցի, դուք էլ միմյա՛նց սիրեցեք: Եթե դուք միմյանց սիրեք, դրանով մարդիկ կիմանան, որ դուք Իմ աշակերտներն եք (Հովհաննես 13:34-35): Նոր և չհնացող պատվիրան, որի իրագործման կարևոր առաքելությամբ Հայ Առաքելական Սուրբ եկեղեցին իր ծառայասիրության ընթացքն է ապրում: ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, Զորավոր Ս. Աստվածածին եկեղեցու համայնքը՝ գլխավորությամբ հոգևոր հովիվ Տեր Գրիգոր քահանա Գրիգորյանի, նախանձախնդիր ոգով իր մասնակցությունն է բերում այս կարևոր առաքելությանը:

Հունվարի 18-ին Զորավոր Ս. Աստվածածին եկեղեցում, Տեր Վահան քհն. Առաքելյանը Յայնվելյան Գայանեին (54 տ.) հանձնեց մոսկվաբնակ Բաղդասարյան ընտանիքի աջակցությամբ գնված սննդի փաթեթ: Տիկին Գայանեն իր երկու թոռնիկների՝ Գոհարի (12 տ.) և Ավետի (6 տ.) հետ բնակվում է Վերին Չարբախի, Արարատյան փողոցի 76/7  հասցեում: Տատիկն է խնամում թոռնիկներին. տիկին Գայանեի երկու դուստրերից մեկը մոտ երկու տարի առաջ, երեսունվեց տարեկան հասակում, հանկարծամահ է եղել (սրտամկանի ինֆարկտ): Մյուս դուստրն էլ իր ընտանիքն ունի: Տիկին Գայանեն ի վիճակի չէ աշխատելու, որպեսզի կարողանա հոգալ իրենց կարիքները, իսկ երեխաների հայրը հրաժարվել է նրանց խնամելու պարտականությունից: Գայանե Յանվելյանը՝ որպես բուժքույր, մասնակցել է Արցախյան հերոսամարտին, երկրորդ խմբի հաշմանդամ է և գլխի վիրահատություն է ունեցել: Կարիքավոր ընտանիքն ապրում է հաշմանդամության և ընտանեկան նպաստի գումարներով:  

«Շնորհակալ եմ այն բոլոր հոգատար և բարի մարդկանցից, որ արձագանքեցին իմ ընտանիքի խնդիրներին և աջակից եղան մեզ»,- ասաց տիկին Գայանեն:

Ըստ եկեղեցու հայրերի՝ հարկ է նաև իմանալ, որ ողորմած է կոչվում ոչ միայն այն մարդը, որ մարմնավոր ողորմածության գործեր է անում, օրինակ՝ կերակրում է քաղցածին, ջուր է տալիս ծարավյալին, հոգատար է օտարականի հանդեպ, հագցնում է մերկին, այցելում է հիվանդներին և բանտարկյալներին, թաղում է մահացածին, այլ նաև նա, ով հոգևոր ողորմածության գործեր է անում, օրինակ՝ ապաշխարության է ուղղորդում մեղավորին, Աստծո մասին է պատմում նրան, ով անտեղյակ է Տիրոջ խոսքին, փորձում է ճիշտ խորհրդատու լինել, աղոթում է Աստծուն իր մերձավորների համար, մխիթարում է տրտմածին,  անտրտունջ համբերում է անհաջողություններին ու փորձություններին և ներում է իր եղբոր սխալները: Ողորմած է նաև նա, ով իր եղբորը սիրում է անկեղծ ու ճշմարիտ սիրով, և սիրով էլ խոնարհվում է եղբորն օգնելու և աջակցելու՝ համբերությամբ իր վրա վերցնելով նրա լուծը, ինչպես ասում է Սողոմոնը՝ գթասիրտ մարդը համբերատար կլինի (Առակներ 19:11):

Կարինե Սուգիկյան