Սիրիահայ համայնքը նշեց հին տոմարով Նոր տարին

Զորավոր Սբ. Աստվածածին եկեղեցու սիրիահայ համայնքը հունվարի 14-ին ԱՀԹ առաջնորդարանում նշեց հին տոմարով Նոր տարին և Սբ. Ծնունդը՝ իրենց բնորոշ սովորությամբ ու հյուրասիրությամբ:

ԱՀԹ առաջնորդական փոխանորդ գերաշնորհ Տեր Նավասարդ արքեպիսկոպոս Կճոյանի գլխավորությամբ տոնախմբությունը սկսվեց «Տերունական աղոթք»-ով: Սրբազան Հայրը Ամանորի և Սբ. Ծննդյան տոների առթիվ, շնորհավորելով սիրիահայերին, մաղթեց, որ յուրաքանչյուրը մանուկ Հիսուսից արժանանա խաղաղության և քաջության ավետիսների: «Քանի որ օրը համընկնել է Սբ. Հովհաննես Մկրտչի ծննդյան օրվա հետ, ուստի մեծ մարգարեի բարեխոսությամբ հայցենք Տիրոջից, որ խաղաղ երկինք պարգևի և Ամենակարողի զորակցությամբ հաղթահարելով բոլոր դժվարությունները՝ Տիրոջ առաջնորդությամբ հասնենք դեպի խաղաղության նավահանգիստ»,- ասաց Սրբազան Հայրը:

«Ամանորը և Սբ. Ծնունդը մեծ տոնախմբությամբ ենք նշել Սիրիայում: Ամանորը, մեր սովորույթի համաձայն, ուղեկցվում էր խաղերով և հետաքրքիր անակնկալներով: Այսօր առաջնորդարանի դահլիճում Սրբազան Հոր օրհնությամբ և մեր համայնքի հոգևոր հովիվ Տեր Գրիգոր քահանա Գրիգորյանի աջակցությամբ ու գլխավորությամբ վերհիշում և նշում ենք մեր Ամանորը: Այստեղ ներկա գտնվող յուրաքանչյուրն իր օջախ կտանի Ամանորի խորհրդանիշ՝ չիր ու չամիչը: Ունենք վիճակահանություն, ըստ որի թե՛ փոքրիկներից և թե՛ մեծերից կընտրվեն այս տարվա հաջողակները»,- ասաց Զորավոր Սբ. Աստվածածին եկեղեցու «Հույսի միավոր» սիրիահայ տիկնանց օժանդակ միության ատենապետուհի Զարուհի Համալյանը:

«Հույսի միավոր» սիրիահայ տիկնանց օժանդակ միության կողմից կազմակերպված տոնախմբության մի մասն էր կազմում հյուրասիրության սեղանը, որ առատ էր իրենց հատուկ ամանորյա ավանդական ուտեստներով:

Ամանորյա տոնախմբությունը սկսված էր, և մինչ կժամաներ սիրիահայ փոքրիկների համար սպասելի հյուրը՝ Կաղանդ պապը, նրանց երգերով, պարերով և խաղերով ուրախացնում էր «Բեբի» ծաղրածուն:

Փոքրիկների ուրախությունը կրկնապատկեց Կաղանդ պապը: Ուրախությունը երկողմանի էր. Կաղանդ պապն էլ ուրախացել էր իր թոռնիկների ասմունքով, երգ ու պարով:

Կաղանդ պապը 40 սիրիահայ երեխաների հանձնեց ԱՀԹ-ի կողմից պատրաստված ամանորյա նվերներ:

11-ամյա Աննա Մարիայի համար սիրելի և սպասելի տոն է Ամանորը: Իսկ տոնին թե՛ Սիրիայում և թե՛ Հայաստանում նա նախապատրաստվում է նախ օգնելով մայրիկին, ապա անհամբերությամբ սպասում է իր սիրելի Կաղանդ պապին:

Ամանորյա տոնախմբությանը մասնակցում էին նաև սիրիահայ երգիչներ, որ իրենց կատարումներով ոգևորել էին թե՛ փոքրիկներին և թե՛ մեծերին:

Կարինե Սուգիկյան