Տարեմուտի գիշերը Զորավոր Սբ. Աստվածածին եկեղեցում

Ամիսների սկիզբն իմաստավորելու հնագույն և գեղեցիկ ավանդույթ ունի Հայ Առաքելական Սբ. Եկեղեցին: Ավանդույթի համաձայն՝ բոլոր եկեղեցիներում Նոր տարվա մուտքն ազդարարվում է աղոթքով:

«Տարվա առաջին ամսվա առաջին օրից, եթե ցանկանում եք օգուտ քաղել,- ասում է Սբ. Հովհան Ոսկեբերանը,- ապա տարեվերջում գոհացեք Արարչից, որ Նա ուղեկցեց ձեզ այդ հորձանուտով: Սրտաբեկ խորհեք ձեր կյանքի անցած օրերի շուրջ. արդյո՞ք անպտուղ չեն անցել տարիները, ժամանակը ապարդյուն չի՞ հոսել, ի՞նչ բարիք եք գործել»:

Ամանորի գիշերը Աստծո տանը գտնվելու, Արարչից գոհություն հայտնելու բարի սովորությունը բազմաթիվ անձանց և ընտանիքների էր մեկտեղել Զորավոր Սուրբ Աստվածածին եկեղեցում:

Արարողությունը սկսվեց Գիշերային ժամերգությամբ, ապա կատարվեց «Վասն Հանրապետութեան Հայաստան աշխարհի» մաղթանքը, որով հայցում ենք Աստծո ամենաառատ ողորմությունը, որպեսզի պահի և պահպանի Հայաստան աշխարհը խաղաղության, բարօրության և անսասանության մեջ:

Հանրապետական մաղթանքից հետո Զորավոր Սուրբ Աստվածածին եկեղեցու հոգևոր հովիվ Տեր Գրիգոր քահանա Գրիգորյանն ամանորյա իր շնորհավորանքի խոսքն ուղղեց ներկաներին. «Թույլ տվեք ջերմագին շնորհավորանքներս ու բարեմաղթանքներս ուղղել ձեզ և ձեր ընտանիքներին՝ Ամանորի այս հրաշալի տոնի առթիվ, և Աստվածային սերն ու բարեշնորհությունը մաղթել ամենքիս: Միմյանց շնորհավորելիս նոր կյանք, նոր ուրախություն ու հաջողություններ ենք մաղթում, տարին սկսում ենք «նորի» ակնկալիքով: Սբ. Պողոս առաքյալն ասել է. «Հեռո՛ւ վանեցեք ձեզնից հին մարդուն իր նախկին կենցաղով, այն, որ ապականված է խաբեպատիր ցանկություններով. նորոգվեցե՛ք ձեր մտքով և հոգով ու հագե՛ք նոր մարդը, որ ստեղծված է ըստ Աստծո՝ արդարությամբ և ճշմարիտ սրբությամբ» (Եփեսացիներ 4:22-24)։ Աստվածորդու երկիր գալով նորացավ նաև ժամանակը և մարդ արարածին էլ հնարավորություն ընձեռնվեց հրաժարվելու իր մեջ ապրող հին մարդուց ու ամեն օր Տիրոջով նորանալու: Արդ, ձգտենք հոգևոր առումով նորանալուն և վստահ լինենք, որ նորի այդ փափագը մշտապես հագեցվելու է Բարեխնամ Հոր կողմից, քանի որ հոգևոր կյանքը՝ Քրիստոս Հիսուսով, իր էությամբ արդեն իսկ նոր է: Միմյանց և այլոց հետ կիսվենք մեր ունեցած նորով, Նրա տված ուրախությամբ ու երանությամբ:

Եվս մեկ անգամ շնորհավորում եմ բոլորիս և ի խորոց սրտի աղոթում մեր Բարեգութ Հորը, որպեսզի Իր երանելի օրհնությունը պարգևի համայն հայությանը, Իր բազմաթիվ առաքինություններով զարդարի ամենքիս հոգիներն ու մեր սրտերից երբեք չպակասի առ Աստված և առ մերձավոր ունեցած սերը, հույսն ու հավատը»:

Գոհաբանական աղոթքից հետո ներկաները մասնակցեցին նաև նռնօրհնեքի կարգին՝ ստանալով օրհնված նռներ: Արդեն երկրորդ տարին է, որ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի բարձր տնօրինությամբ Տարեմուտին կատարվում է օրհնության այս նոր կարգը՝ նռնօրհնեքը:

Քրիստոնեության մեջ նռան սիմվոլիկան բավականին տարողունակ է, այն մեր Տիրոջ՝ Հիսուս Քրիստոսի խորհրդապատկերն է՝ Իր՝ գավաթում հեղված արյամբ, իսկ կերպարվեստում, երբ պատկերել են Տիրոջը՝ նռով, արտահայտել են Քրիստոսի հարության գաղափարը: Նուռը խորհրդանշում է աստվածային շնորհների բազմազանությունը, Եկեղեցին՝ իր բազմաթիվ հոտով:

Կարինե Սուգիկյան