Զանազան չարիքներից փրկող ողորմությունը

Ողորմությունը դա հանդիպում է. հանդիպում մարդու և Աստծո միջև: Դա մի հնարավորություն է կյանքի սրընթաց ռիթմի մեջ կանգ առնել Աստծո պատկերը և նմանությունը կրող այն անձի կողքին, ով կարիքի մեջ է և ցուցաբերել գթասրտություն: Ողորմություն-հանդիպումն անհրաժեշտ է և՛ տվողին և՛ վերցնողին, բայց, ըստ Սբ. Գրքի և եկեղեցու հայրերի խոսքի, այն առավել անհրաժեշտ է տվողին: Ամեն անգամ երկու միմյանց մեկնող ձեռքերի հանդիպումն աշխարհը դարձնում է առավել անշահախնդիր և մարդկային:

Եկեղեցական համայնքային կյանքից ներս հոգու պահանջ և կարևոր առաքելություն են ողորմություն-հանդիպումները:

Պահեցողության շրջանում, Զորավոր Սբ. Աստվածածին եկեղեցու համայնքը, հոգևոր հովվի՝ Տեր Գրիգոր քահանա Գրիգորյանի գլխավորությամբ, մեծ ուրախությամբ է ընդառաջ գնում այս հանդիպումներին:

Մարտի 18-ին համայնքն իր հերթական հանդիպումով եղավ Բուզանդի 22 հասցեում վարձակալությամբ ապրող Ավետյան ընտանիքում: Բազմազավակ անապահով ընտանիքի մայրը՝ 39-ամյա Մարինե Ավետյանը, իր մայրիկի և չորս զավակների հետ երկու տարի է, ինչ, տեղափոխվելով Արարատի մարզից, ապրում է տարրական պայմաններից զուրկ կիսաքանդ և խոնավ երկու սենյականոց տանը: Հարևաններից յուրաքանչյուրը փորձել է որևէ կերպ օգտակար լինել կարիքի մեջ հայտնված այս ընտանիքին: Ավետյան ընտանիքը Երևան է տեղափոխվել զավակներից երկուսի առողջական խնդիրների պատճառով. 9-ամյա Գևորգն ունի երիկամների խնդիր՝ սուր պոլիոնևֆրիտ, իսկ 4-ամյա Էվելինան կոնքազդրային բնածին հոդախախտի պատճառով արդեն մի քանի անգամ վիրահատվել է և այժմ թե՛ նա և թե՛ Գևորգը պարբերաբար բուժումների կարիք ունեն: Մարինեն և իր մայրը նույնպես երիկամային խնդիր ունեն: Ընտանիքի ավագ որդին զորակոչվել է Հայոց բանակ: Երեք տարի է, որ Մարինեի ամուսինը լքել է ընտանիքը, և նա մեծ դժվարությամբ է խնամում իր զավակներին:

«Ավագ դուստրս և տղաս՝ Գևորգը, մեկ ամիս դպրոց չեն հաճախել՝ հագուստ չունենալու պատճառով և այժմ նպաստ ստանալու ակնկալիքով՝ փորձում ենք գրանցվել Երևանում»,-ասաց Մարինեն:

Տեր Գրիգորը բժշկության աղոթք կարդաց և ընտանիքին հանձնեց համայնքի կողմից տրամադրած հերթական օգնությունը՝ սննդի փաթեթներ, հիգիենայի պարագաներ և դրամական օգնություն՝ Էվելինայի և Գևորգի ընթացիկ բուժումը շարունակելու համար: Ավետյան ընտանիքն իր գոհունակությունը հայտնեց Տեր Հորն ու համայնքին աջակցության համար:

Սիրաքի իմաստության գիրքն իր ընթերցողին հորդորում է. «Քո գանձն օգտագործի՛ր համաձայն Բարձրյալի պատվիրանների, և դա քեզ օգուտ կլինի ոսկուց ավելի: Ողորմությո՛ւն հավաքիր քո շտեմարաններում, և այն կփրկի քեզ զանազան չարիքներից, թշնամու դեմ կճակատի քեզ համար հզոր վահանից և ծանր նիզակից ավելի» (Սիրաքի իմաստություն 29:14-16):

Կարինե Սուգիկյան