Զատկական միջոցառում ԱՀԹ «Ցերեկային կենտրոն»-ում

Համաշխարհային պատմության մեջ նշանավոր և աշխարհացունց իրադարձություն է Քրիստոսի Հարությունը: Այդ օրը ողջ մարդկությունը, ինչպես նաև մեզանից յուրաքանչյուրը, ստացավ փրկության հույսը. Հարություն առավ Քրիստոս:

Մեր հավատքը իմաստավորվում է Քրիստոսի Հարությամբ: Քրիստոնեական միջավայրում թե՛ ծնողի և թե՛ մանկավարժի համար անչափ կարևոր է, որ երեխայի հավատքը փոքրուց իմաստավորվի և աճի Քրիստոսի հրաշափառ Հարությամբ:

Այս կարևոր նպատակին է հետամուտ լինում Հայ Առաքելական Սուրբ եկեղեցու Արարատյան Հայրապետական թեմի «Ցերեկային կենտրոն»-ը, որտեղ կենտրոնի հոգևոր հովիվ Տեր Գրիգոր քահանա Գրիգորյանի և կրոնի մանկավարժի շնորհիվ սաներն ու ծնողները հաղորդ են դառնում քրիստոնեական ճշմարտություններին: Սուրբ Զատկի տոնին կրոնի մանկավարժ Ռուզաննայի գլխավորությամբ կենտրոնի սաները պատրաստել էին միջոցառում:

«Ցերեկային կենտրոն»-ի սաները, մանկավարժները, ծնողները հոգևոր հովիվ Տեր Գրիգոր քահանա Գրիգորյանի գլխավորությամբ միջոցառումը սկսեցին Տերունական աղոթքով:

Փոքրիկ Գոռի ջութակի հնչողության ներքո ազդարարվեց միջոցառման սկիզբը:

Իսկ թե այս տարի, ըստ եկեղեցական տոնացույցի, ո՞ր օրն ենք նշում Սուրբ Զատիկը, շարժական է, թե՞ անշարժ տոն, ի՞նչ է նշանակում այդ բառի հոգևոր իմաստը, ի՞նչ շրջան և շաբաթ է նախորդում Սբ. Զատկի տոնին, ինչպե՞ս ենք ողջունում միմյանց Սբ. Զատկին և նրան հաջորդող օրերին, ի՞նչ ավանդություններ և ժողովրդական սովորություններ են պահպանվել առ այսօր, ի՞նչ են պատմում ավետարանիչները Քրիստոսի Հարության մասին, ո՞րն է Սբ. Զատկի խորհրդանիշը, այս հարցերի պատասխանները մանրամասնորեն ներկայացրեցին «Ցերեկային կենտրոն»-ի սաները:

Միջոցառման ավարտին երեխաները զատկական ավետիսով`«Քրիստոս յարեաւ ի մեռելոց», ողջունեցին ներկաներին:

Ապա Տեր Գրիգորը կենտրոնի սաներին, ծնողներին և մանկավարժներին փոխանցեց Արարատյան Հայրապետական թեմի առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի օրհնությունն ու շնորհավորանքը Սուրբ Զատկի տոնին նվիրված: «Մեծ ուրախություն պարգևեցիք մեզ, ձեզանով ուրախանալու դեռ շատ առիթներ կունենանք: Վստահ եմ, նոր կյանք մտնելով, քրիստոնեական ամուր ընտանիք կկազմեք՝ աստվածահաճո ընթացք ունենալով: Սուրբ Զատիկը զատեց մեզ մեղքից, քանդեց դժոխքը, Քրիստոս Հարություն առավ՝ ցույց տալով մեզ նոր կյանքը: Թող Հարության լույսը միշտ վառ մնա բոլորիս հոգում», -ասաց Տեր Հայրը և պահպանիչ աղոթքով եզրափակեց իր խոսքը:

Սրբազան հոր կողմից սաների համար զատկական նվերը զատկական սեղանն էր, որի շուրջ նստելով, նրանք անմիջապես անցան ձվախաղերի:

«Սուրբ Զատիկը ինձ համար ուրախության տոն է, քանի որ Հիսուս Քրիստոս մեռելներից հարություն առավ»,- ասաց կենտրոնի սաներից իննամյա Գոռը: Նա տոնի հետ կապված իր ուրախության մասին պատմում է նաև իր ընկերներին և ուրախությամբ նշեց, որ ինքն այս տոնին ընտանիքով գնալու է եկեղեցի:

14-ամյա Արթուրն ասաց, որ Սուրբ Զատիկը բացառիկ դեպքերից մեկն է, Հիսուս հարություն առավ, հաղթեց մահվանը և Նրա գերեզմանը թափուր է:

Հայկական Կարմիր խաչ ընկերությունը մեկ տարուց ավել է, ինչ իտալական Կարմիր խաչի ֆինանսավորմամբ ՄԻԱՎ-ի կանխարգելումը Հայաստանում ծրագրի շրջանակներում համագործակցում է Արարատյան Հայրապետական թեմի «Ցերեկային կենտրոն»-ի հետ: Միջոցառմանը Հայկական Կարմիր խաչ ընկերության երիտասարդական բաժնի

աշխատակցուհի Սոնա Գևորգյանի հետ «Ցերեկային կենտրոն» էին հյուրընկալել Բրիտանական Կարմիր խաչ ընկերության երկու կամավորները՝ Ջեսին և Ջենին, ովքեր եվրոպական կամավորական ծառայության ծրագրի շրջանակներում առաջին անգամ էին Հայաստանում: Նրանք դիտեցին կենտրոնի սաների կողմից կավից պատրաստված աշխատանքները և հիացան՝ նշելով, որ բոլոր աշխատանքներում մի առանձնահատուկ ձեռագիր կա՝ հայկական ձեռագիր:

Այսպես, տոների տոնի՝ Սուրբ Զատկից բխող անբացատրելի ուրախությունը պատել էր բոլորին՝ հիշեցնելով կյանք պարգևող Քրիստոսի այն խոսքերը, որ Նա ասաց Իր Հարությունից առաջ. «Ես ապրում եմ, դուք էլ կապրեք» (Հովհաննես 14:19) և «Այս բաները ասացի ձեզ, որպեսզի Իմ ուրախությունը ձեր մեջ լինի, և ձեր ուրախությունը կատարյալ լինի» (Հովհաննես 15:11):

Կարինե Սուգիկյան