28 Նոյեմբեր, Եշ
Հինանց շրջանի Կարմիր կիրակի օրը՝ ապրիլի 26-ին, ԱՀԹ Զորավոր Սուրբ Աստվածածին եկեղեցու «Զորավոր» երիտասարդաց միությունը իրենց հոգևոր պատասխանատու Տ. Զգոն քահանա Աբրահամյանի հետ հերթական անգամ այցելեցին Մարի Իզմիրլյանի անվան մանկատուն:
Տեր Զգոնը մանկատան տնօրինությանը, մանկավարժներին և երեխաներին փոխանցեց ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոսի օրհնությունը: Մանկատան սաների համար սպասված բարեկամներ են դարձել Զորավոր Սուրբ Աստվածածին եկեղեցու երիտասարդներն ու հոգևորականները: Այս անգամ երեխաներին խաղերով, երգ ու պարով զվարճացնում էր «Բում- Բումիկ»-ի հերոսուհին:
Երիտասարդները Տեր Հոր հետ, շրջելով սենյակներով, երեխաներին բաժանեցին խաղալիքներ, միրգ, քաղցրավենիք և հիգիենիկ պարագաներ: Տեր Զգոնը բժշկության աղոթք կատարեց հիվանդ երեխաների համար:
Ապա սիրո և ուրախության մթնոլորտում մանկատան սաներն ու երիտասարդաց միության անդամները միմյանց հրաժեշտ տվեցին:
Կարինե Սուգիկյան
Զորավոր Սուրբ Աստվածածին եկեղեցի