23 Դեկտեմբեր, Բշ
Հայաստանի ազգային պատկերասրահի «Հակոբ Կոջոյանի և Արա Սարգսյանի տուն-թանգարան»-ի մասնաճյուղն ամեն տարի՝ ապրիլի 7-ին, նշում է ԽՍՀՄ ժողովրդական նկարիչ, հայկական կերպարվեստում մոնումենտալ և հաստոցային քանդակագործության խոշոր ներկայացուցիչ Արա Սարգսյանի ծննդյան տարելիցը: Այս տարի տուն-թանգարանը մեծանուն նկարչի և քանդակագործի ծննդյան 114-րդ ամյակը պատվեց համերգային ծրագրով, քանդակագործական ու գեղանկարչական աշխատանքների ցուցահանդեսով և ֆիլմի դիտումով:
«Հակոբ Կոջոյանի և Արա Սարգսյանի տուն-թանգարան»-ի մասնաճյուղի բակում հրավիրյալները՝ արվեստի տարբեր ոլորտի ներկայացուցիչներն ու հյուրերը, դիտեցին ժամանակակից հայ քանդակագործների՝ Գևորգ Հարությունյանի և Նունե Թումանյանի աշխատանքները, Հայաստանի մասին պատմող իր գեղանկարչական աշխատանքներով ներկայացել էր նաև Բուլղարիայի Հանրապետության դեսպանության խորհրդական Վասիլ Վասիլևը:
Մինչ համերգային ծրագիրը ներկաները մեկ րոպե լռությամբ հարգեցին Արցախում զոհված քաջազուն զինվորների հիշատակը: Համերգային ծրագրով հանդես եկավ Զորավոր Սբ. Աստվածածին եկեղեցու «Զորավոր մանկունք» երգչախումբը՝ գեղարվեստական ղեկավար Գոհար Հարությունյանի գլխավորությամբ: Մանուկների շուրթերից հնչեցին քաղցրահնչյուն շարականներ՝ «Այսօր ձայնն հայրական», «Զարթիք փառք իմ», «Բազում են քո գթութիւնքդ», «Մեծացուսցէ», կոմիտասյան մշակմամբ «Տեր ողորմեա»-ն և «Սուրբ, սուրբ»-ը:
«Հակոբ Կոջոյանի և Արա Սարգսյանի տուն-թանգարան»-ի մասնաճյուղի տնօրեն, Արա Սարգսյանի թոռնուհի Աննա Սարգսյանը նշեց, որ Զորավոր Սբ. Աստվածածին եկեղեցու հետ երեք տարվա համագործակցության արդյունքում «Զորավոր մանկունք» երգչախումբը համերգային մի շարք ծրագրերով է հանդես եկել տուն-թանգարանում:
Տաղանդավոր նկարչի և քանդակագործի ծննդյան օրը տուն-թանգարանում տնօրհնեքի կարգ կատարվեց՝ ձեռամբ Զորավոր Սբ. Աստվածածին եկեղեցու խորհդակատար Տեր Վահան քահանա Առաքելյանի: Տեր Հայրը Հարության ավետիսը փոխանցեց ներկաներին, շնորհավորեց օրվա առթիվ և ասաց. «Մեր ժողովրդի սեփականությունն է դարձել մեծ հայորդու կերտած և արարած արժեքները: Մեր ներկայությամբ մենք կարևորում և վկայակոչում ենք մեծանուն հայորդու՝ Արա Սարգսյանի հիշատակը՝ արժևորելով նրա թողած հոգևոր և բարոյական արժեքները: Թող Աստված նրա հոգուն խաղաղություն և հավիտենական անդորր պարգևի, մեզ էլ՝ սեր և օրհնություն՝ նրա հիշատակը վառ պահելու համար: Քրիստոսի հարությամբ զորացած՝ շարունակենք ապրել և արարել՝ որպես Աստծո հավատարիմ և ճշմարիտ հետևորդներ»:
Ապա ներկաներն ունկնդրեցին Արա Սարգսյանի կյանքին և գործունեությանը նվիրված համառոտ ակնարկը և դիտեցին նրա մասին պատմող ֆիլմը:
Ապրիլի 7-ին արվեսատասերները ևս մեկ անգամ հաղորդակից դարձան Արա Սարգսյանի կերտած բարձրագույն արվեստին: Իսկական արվեստը երբեք չի խամրում և չի հնանում, տաղանդավոր նկարչի և քանդակագործի աշխատանքները եկող սերունդների համար մեծ արվեստի հետ շփվելու մի դարբնոց է հանդիսանում:
Կարինե Սուգիկյան
Զորավոր Սուրբ Աստվածածին եկեղեցի