Ս. Մետրոփանոս հայրապետը Պրոբիոս կայսեր որդին էր: Ձեռնադրվել է Բյուզանդիոնի Տիտոս եպիսկոպոսի կողմից` որպես եպիսկոպոս հաջորդելով նրան: Նա մեծ հավատ և բարի համբավ ունեցող հայրապետ է եղել, իր հեղինակությամբ կարողացել է ազդել անգամ Կոստանդիանոս Մեծի վրա` նպաստելով որ նորակառույց մայրաքաղաքը լիներ Բյուզանդիոնի տեղում: Նույն կայսեր կողմից դարձել է Կ.Պոլսի առաջին եպիսկոպոսը: Ծերացած լինելու պատճառով նա չի կարողացել մասնակցել 325 թվականին Նիկիայի առաջին Տիեզերաժողովին` իր փոխարեն ուղարկելով Աղեքսանդրոսին, ով հետագայում հաջորդեց նրան: Վախճանվել է խաղաղ մահով 326 թվականին: Ս. Աղեքսանդրոս հայրապետը հաջորդել է Ս. Մետրոփանոս հայրապետին: Ավանդության համաձայն` նա եպիսկոպոս է ձեռնադրվել Նիկիայի Տիեզերաժողովին մասնակից հայրապետների կողմից, երբ նրանք կայսեր հրավերով եկել էին մասնակցելու իր նախորդի հուղարկավորությանը: Ս. Աղեքսանդրոսը մասնակցել է Քրիստոսի Եկեղեցու Ա տիեզերաժողովին: Եղել է առատաձեռն, պերճախոս, արդար և աներեր հավատ ունեցող հայրապետ, ով իր ողջ գիտակցական կյանքում պայքար է մղել արիոսականության և հեթանոս իմաստասերների դեմ: Եկեղեցական ավանդությունը վկայում է, որ նրա և Ս. Հակոբ Մծբնա հայրապետի աղոթքների շնորհիվ Արիոսը չարաչար մահով մահացել է: Ս. Աղեքսանդրս հայրապետը վախճանվել է 326 թվականին (որոշ աղբյուրների համաձայն` 337 թվականին): Ս. Պողոս Խոստովանող հայրապետը ծնվել է Սելանիկում` լինելով բարեպաշտ, աստվածավախ և Սուրբ Գրքին գիտակ մարդ: Նա հաջորդել է Կ.Պոլսի Ս. Աղեքսանդրոս հայրապետին: Կոստանցիոս կայսեր կողմից աքսորվել է Պոնտոս` արիոսականների դեմ ունեցած խիստ կեցվածքի համար: Նա կրկին Կ.Պոլիս է վերադարձել 338 թվականին: Բացի սրանից հայրապետին վիճակված էր ևս երեք անգամ գտնվել աքսորում: Վերջին անգամ աքսորն անցկացրել է Հայոց աշխարհի Կոկիսոն քաղաքում, ուր և նահատակվել է արիսոսականների կողմից: Վերջիններս նրան խեղդել են Սուրբ Պատարագի ժամանակ 350 թվականին: Ս. Մարկիանոսը և Ս. Մարտիրոնն ավագ դպիրներ էին, ովքեր միաժամանակ որպես նոտարներ ծառայում էին Կ.Պոլսի Պատրիարքարանում` օգնելով ժամանակի Ս. Պողոս Խոստովանող հայրապետին: Երբ լսում են վերջինիս մահվան լուրը, նրանք ամբողջ ժողովրդի մեջ տարածում են, որ ուղղափառ հավատի ջերմեռանդ պաշտպան Ս. Պողոս հայրապետի մահվան պատճառն արիոսականներն են: Նրանց լռեցնելու համար քաղաքի արիոսական եպարքոսը գլխատել է տալիս նրանց 350 թվականին: