Ամառային գույներով հագեցած ԱՀԹ «Ցերեկային կենտրոն»-ի բակային ճամբարը

Ամառվա տապին ԱՀԹ «Ցերեկային կենտրոն»-ի երեխաներին ուրախ և անմոռանալի օրեր պարգևելու մեծ ցանկությամբ Երիտասարդական Կարմիր Խաչը (ԵԿԽ) հուլիսի 8-ին մեկնարկեց իննօրյա ամառային-բակային ճամբարը: Սա ԵԿԽ-ի առաջին կազմակերպված ճամբարն էր «Ցերեկային կենտրոն»-ում:

ԵԿԽ-ի աշխատակիցների և կամավորների նախանձախնդրությունն ու պատրաստվածությունն ուղղված էր նրան, որ ճամբարային օրը յուրաքանչյուր երեխայի համար դառնա հետաքրքիր և հագեցած:

Ճամբարային օրը սկսված էր: Բոլորը կազմել էին շրջան, նրանցից յուրաքանչյուրն, որևէ շարժում անելով, իր անվանումն էր ասում:

Քանի որ ճամբարն ունի նաև ուսուցողական նպատակ, ապա ԵԿԽ-ի աշխատակից Արմինեն երեխաներին վարժություններով հիշեցրեց, որ առողջության համար շատ կարևոր է օրը սկսել մարմնամարզությամբ: Արմինեի առաջարկմամբ երեխաները մարզվեցին նաև իրենց իսկ ներկայացրած վարժություններով:

Ինչպես բոլոր ճամբարները, այնպես էլ այս ճամբարը պետք է առաջնորդվի կանոններով, ինչն էլ երեխաները կազմեցին ԵԿԽ-ի աշխատակիցների և կամավորների հետ միասին: Նրանք խոստացան, որ, համաձայն կանոնների, չեն ուշանա, կհարգեն և կլսեն միմյանց, կպահպանեն մաքրություն, չեն կռվի և ակտիվ կլինեն: Իսկ կանոնը խախտողը պետք է ամբողջ օրը հետևեր տարածքի մաքրությանը:

Երեխաները ճամբարի կազմակերպիչների հետ շրջանաձև նստած քննարկում էին նաև ճամբարի անվանումը: «Ամառային գույներ», «Զվարճալի կամ ուրախ ճամբար», «Հանգստյան ճամբար», «Արևիկ», «Լույսի շող», «Ընկերություն», «Մանուկների աշխարհ», «Նուռ», «Բաց երկինք». ահա այս առաջարկությունները եղան և ընդհանուր որոշմամբ ընտրվեց «Ամառային գույներ» անվանումը: Տիգրանը (10 տ.) ասաց, որ այստեղ շատ գունագեղ է, պայծառ, ամառային բոլոր գույները կան:

Նախաճաշից հետո երեխաները հայտնվեցին ազգային պարի աշխարհում. կամավորներից Անուշն ազգային պոպուրին էր ուսուցանում բոլորին: Նա մեր ազգային մի քանի պարերի բացատրությունն էր տալիս՝ նշելով, որ ազգային պոպուրին ծիսական պար է, տոն օրերին են պարել, իսկ, օրինակ, «Քերծեն» պարել են որսի գնալուց առաջ: Իսկ պարել սիրող երեխաների ակտիվությունը նկատելի էր. երկվորյակներ Լևոնն ու Լաուրան (11 տ.) շատ են սիրում պարել: Նրանք ուրախ են, որ մասնակից են լինելու բակային ճամբարին:

Վեցամյա Եկատիրինան առաջին անգամ է ճամբարի մասնակցում, նրա մայրը՝ Նունեն, իր զավակի հետ միասին ոգևորություն էր ապրում: «Ամառվա այս շոգին երեխային ուրախ տեսնելն արդեն իսկ ամեն ինչ արժե»,- ասաց նա:

Հայկական Կարմիր Խաչ ընկերության երիտասարդական բաժնի աշխատակցուհի Սոնա Գևորգյանը նշեց. «Ճամբարի հիմնական նպատակը միմյանց հետ առավել մտերմանալն է, լավ ժամանակ անցկացնելը, ինչպես նաև միմյանցից որևէ բան սովորելը: Կամավորները մեծ շահագրգռությամբ և սիրով առաջարկություններ են կատարել և պատրաստ են իրենց ներուժը գործածել բակային ճամբարում: Նրանց աշխատանքը բաժանված է տարբեր կոմպոնենտների: Ամեն ինչ կանենք, որ մեր ճամբարը դառնա գունավոր»:

Ճամբարում երեխաները նաև առիթ ունեցան կամավորներից Անիի հետ անգլերենով քննարկել և զրուցել գազավորված հյութերի մասին:

Ճաշից հետո երեխաները միմյանց և ԵԿԽ-ի աշխատակիցներին ու կամավորներին հրաժեշտ տվեցին հաջորդ օրը միասին ամառային գույներով հագեցած ճամբարի մի նոր, հետաքրքիր էջ թերթելու մեծ ցանկությամբ:

Կարինե Սուգիկյան