Մարտի 30-ին Զորավոր Ս. Աստվածածին եկեղեցու «Զորավոր» երիտասարդաց միությունը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և միության հոգևոր պատասխանատու Տեր Վահան քահանա Առաքելյանի առաջնորդությամբ, ուխտի մեկնեց Կոտայքի թեմի Ակունք գյուղի Ս. Պողոս-Պետրոս մատուռ-սրբավայր: Մինչև աղոթքի ճանապարհ անցնելը երիտասարդ ուխտավորները Զորավոր Ս. Աստվածածին եկեղեցում մասնակից եղան Սուրբ և Անմահ Պատարագին:
Պահքի շրջանում երիտասարդների աղոթքի ուղին ևս մեկ միջոց էր՝ անդրադառնալու իրենց ապրած կյանքին ու կոչմանը: Սիրառատ Հայրն ամեն տարի Իր զավակներին պահեցողության՝ աղոթքի, ողորմածության և սիրո ուղի անցնելու հնարավորություն է տալիս: Հասնելով սրբավայր՝ երիտասարդաց միությունը, Տեր Վահանի գլխավորությամբ, միասնական աղոթքի կանգնեց՝ Տիրոջ ողորմածությունը հայցելով Հայոց աշխարհի համար: Այնուհետև Տեր Հայրը «Պահպանիչ» աղոթք կարդաց և մաղթեց երիտասարդներին, որ զորանան հավատքի մեջ և Մեծ պահքի Դատավորի կիրակիի խորհրդի համաձայն՝ մշտապես և անձանձրույթ աղոթեն, փորձության մեջ չընկնելու (Մատթ. 26:41) և իրենց կյանքը ամենավստահելի, ամենահուսալի և ամենակարող Աստծուն վստահելու համար:
Մեծ պահքի հերթական կիրակին, Հայ եկեղեցու առաջին հայրապետ սբ. Գրիգոր Լուսավորչի հորդորի համաձայն, պատգամում է՝ ամենուր անխափան կատարել աղոթքի ծառայությունը՝ թե՝ տանը նստած, թե՛ ճանապարհ գնալիս, թե՛ աշխատելիս, թե՛ ննջելիս և թե՛ արթնանալիս:
Կարինե Սուգիկյան
Զորավոր Սուրբ Աստվածածին եկեղեցի