23 Նոյեմբեր, Շբ
Ոմն ծեր աղոթքի ժամանակ մեծ տեսիլքներ էր տեսնում: Մի զորավար եկավ և նրան դահեկաններ տվեց, իսկ ծերը վերցրեց: Եվ երբ վերցրեց, չէր կարողանում այն նույն տեսիլքները տեսնել ու զարհուրեց: Քննեց իր խորհուրդները և ոչ մի պատճառ չգտավ: Ապա աղաչեց Աստծուն՝ հայտնել իրեն իսկությունը: Հրեշտակը նրան ասաց. «Քանի դեռ քեզ մոտ են դահեկանները, արժանի չես լինի տեսիլքներ տեսնելու, քանզի դահեկանների չափով դու էլ մաս ունես զորավարի չար գործերի մեջ: Եթե կամենում ես` վերադարձրո՛ւ զորավարին, կամ՝ եթե կամենում ես` տո՛ւր կարոտյալներին: Պահելը կրոնավորի գործ չէ, և ոչ էլ Աստծուն է հաճո»: Եվ ծերը, հավաքելով եղբայրներին, պատմեց նրանց, և այնուհետև ոչինչ չէին վերցնում աշխարհականներից, այլ ասում էին. «Տվե՛ք կարոտյալներին, և մենք կաղոթենք ձեզ համար»:
«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016
Զորավոր Սուրբ Աստվածածին եկեղեցի