Գրքեր

«Աշխարհը կանգուն է աղոթքի շնորհիվ»

Սեպտեմբերի 17-ին՝ Հայաստանի Հանրապետության անկախության տոնին ընդառաջ՝ Զորավոր Ս. Աստվածածին եկեղեցու սիրիահայ համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, ուխտագնացության մեկնեց Գեղարքունիքի թեմի սրբավայրեր: Ուխտավորների՝ աղոթքով և շարականներով հագեցած ուղին կանգ առավ Հայրավանքում (4-րդ դ.), որ հայտնի է Հայր Հոհանք, Հայրուվանք, Հայր Օհավանք, ինչպես նաև Մարդաղավնյաց վանք անվանումներով: Հայրավանքի Ս. Ստեփանոս եկեղեցում ուխտավորները, եկեղեցու հոգևոր հովիվ Տեր Գնել քահանա Մարտիրոսյանի գլխավորությամբ, «Տերունական աղոթք»-ն ասացին, «Տեր ողորմեա» և Ս. Խաչին նվիրված շարականներ երգեցին և Ս. Ստեփանոսի բարեխոսությանը դիմելով՝ Տիրոջ ողորմածությունը հայցեցին Հայ եկեղեցու և Հայոց ու Արցախ աշխարհների և Հայոց բանակի համար: Սիրիահայերից շատերն առաջին անգամ էին Հայրավանքում և ինչպես նշեցին՝ ամեն անգամ ուխտագնացության միջոցով, հայրենի սրբավայրերին ծանոթանալուց և միասնական աղոթքից զատ, հայրենիքի և հողի կարոտն են առնում:

Հաջորդ սրբավայրը, որ հյուրընկալեց ուխտավորներին, Սևանավանքն էր, որ հիմնադրել է Ս.Գրիգոր Լուսավորիչը 305թ.-ին: Վանքի բոլոր եկեղեցիներում ուխտավորները իրենց միասնական աղոթքը վերառաքեցին առ Տեր: Այնուհետև սիրիահայ ուխտավորները համախմբվեցին սիրո սեղանի շուրջ:

Ուխտավորի ուղին Տիրոջ հետևյալ խոսքի՝ «Արթուն կացեք և ամենայն ժամ աղոթեցեք» (Մատթ. 26:41, Ղուկ. 18:1) կենդանի օրինակներից մեկն է: «Աշխարհը,- ինչպես նշել է Ս. Սիվղանոս Աթոսացին,- կանգուն է աղոթքի շնորհիվ: Աղոթքի թուլանալուն պես աշխարհը կկործանվի»:

 

Կարինե Սուգիկյան

17.09.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․