Ավետում. կինն արժանացավ Աստծո մեծագույն շնորհին

Հայ Առաքելական Սուրբ եկեղեցին Աստվածամորը նվիրված յոթ տոներից Ավետումն Ս. Մարիամ Աստվածածնի տոնը նշում է ապրիլի 7-ին: Ողջ քրիստոնյա աշխարհի համար կարևորագույն մի տոն. ավետվեց աշխարհի Փրկչի ծննդյան ավետիսը: Մարիամը, Աստվածամայր դառնալով, երջանկահիշատակ Գարեգին Ա կաթողիկոսի խոսքով, իր անձի մեջ խտացրեց մայրության բարձրագույն արտահայտությունը՝ իր կերպարում վեհագույն ձևով դրսևորելով կնոջ դերը: Աստծու Որդին մարդեղացավ, ծնվեց Ս. Կույս Մարիամ Աստվածածնից, և այդուհետ կինն արժանացավ Աստծու մեծագույն շնորհին (Ղուկ. 1:26-38):

Ապրիլի 7-ին Զորավոր Ս. Աստվածածին եկեղեցում տոնական Ս. Պատարագ մատուցվեց, որին ներկա էին նաև ապագա մայրերը: Օրն առանձնահատուկ էր նրանց համար, քանի որ, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի բարձր տնօրինությամբ, տարիներ առաջ Ավետման տոնը հռչակվել է մայրության բերկրանքին սպասող կանանց օրհնության օր: Պատարագիչը՝ Տեր Վահան քահանա Առաքելյանը, նախքան քարոզը շնորհավորեց կանանց և աղջիկներին, նրանց փոխանցելով ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի հայրական օրհնությունը, և մաղթեց, որ Սուրբ Կույս Մարիամ Աստվածածնի բարեխոսությամբ արժանանան Տիրոջ օրհնությանը՝ ապրելով խաղաղ և երջանիկ օրեր: Իսկ քարոզին Տեր Հայրը մասնավորաբար ասաց. «Ավետման տոնը մեզ համար բերկրանքի առիթ է: Մենք ուրախությամբ և ցնծությամբ շնորհավորում ենք միմյանց, ինչպես որ բերկրանք և ուրախություն է ենթադրում Աստծու Որդու ծննդյան ավետիսը: Ցնծություն, որ համակում է յուրաքանչյուրիս, քանի որ յուրաքանչյուրիս համար է Աստծու մարդեղացումը, յուրաքանչյուրիս է վերաբերում և յուրաքանչյուրիս է փրկություն ավետում: Տիրամոր բարեխոսությանը ապավինելով՝ մենք ոչ միայն ապրում ենք մեր կյանքը ներկայում, այսօր, այս պահին, այլ նաև փորձում ենք կառուցել մեր ապագայի տեսիլքը: Ուրեմն՝ խնդրենք Աստվածամոր բարեխոսությունը, որպեսզի միշտ կարողանանք հաղթահարել ամեն տեսակի փորձություն մեր կյանքում և փաստենք մեր հավատքն առ Աստված, ընթանանք մեր կյանքի ճանապարհը՝ մեզ հանձնելով Աստծու նախախնամությանը, վստահ լինելով, որ խոնարհության ու հնազանդության հետևից գալու է երկնային փառքը, որին արժանացավ Փրկչի մայրը»:

Ս. Պատարագի ավարտին հոգևոր դասի և խաչքավոր Ֆրանկյան ընտանիքի կողմից եկեղեցում ներկա կանանց ու աղջիկներին վարդեր բաժանվեցին, որը, ինչպես նշեց Տեր Վահանը, տոնի առթիվ, Տիրամոր բարեխոսությամբ և օրհնությամբ, մայրերի ու քույրերի հանդեպ սիրո, հարգանքի և հավատքի առհավատչյան արտահայտող մի մասունք է: Այս գեղեցիկ սովորությունն արդեն երրորդ տարին է, որ կյանքի է կոչվել եկեղեցու հոգևոր հովիվ Տեր Գրիգոր քահանա Գրիգորյանի նախաձեռնությամբ: Տոնի առթիվ կանայք ու աղջիկները նաև աղոթագիրք նվեր ստացան, որ հրատարակվել է ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանի նախաձեռնությամբ ու աշխատասիրությամբ և եկեղեցու ծխական խորհրդի անդամ Սոնա Աբելյանի մեկենասությամբ՝ ի հիշատակ իր մայրիկի՝ Լինա Իսրայելյանի: Իսկ եկեղեցու երիտասարդաց միության աղջիկներին բաժանվեցին Տիրամոր պատկերով կուլոններ:

Ավետումն Ս. Մարիամ Աստվածածնի տոնը հոգևոր ուրախությամբ և ջերմությամբ էր համակել բոլորին: Աստվածամայրը՝ որպես աստվածային շնորհներով լեցուն մոր կերպար, դարձավ Աստծու «կենդանի տաճարը» և «լուսավոր ամպը, որից կյանքի ցողը թափվեց բանական երկրի վրա»:

Կարինե Սուգիկյան