Գրքեր

Այսօր Նավասարդ Սրբազանի ծննդյան տարեդարձն է

Գերաշնո՛րհ Սրբազան Հայր,

Զորավոր Սուրբ Աստվածածին Եկեղեցու հոգևորականաց դասի և հավատացյալ համայնքի անունից մեծագույն սիրով շնորհավորում եմ Ձերդ Սրբազնության ծննդյան տարեդարձը, և որդիական խոնարհումս բերում Ձեզ:

«Ծնողներին չեն ընտրում», այո՛, և մենք այն երջանիկներից ենք, որ մեծ օրհնության ենք արժանացել Բարձրյալից՝ Ձեզ նման հոգատար, իմաստուն և զորեղ հոգևոր հայր ունենալով:

Սիրելի՛ Սրբազան, այսօր Ձեր ճերմակող մազերը վկայում են ոչ միայն Ձեր անցած ճանապարհի, այլև Ձեզ վստահված հոտի մասին մշտական հոգածության և կյանքի հողմերից այն հնարավորինս պաշտպանելու մասին:

Նայելով Ձեզ` մենք սովորել ենք անվեհերությամբ դիմակայել բոլոր փորձություններին և իմաստությամբ կայացնել յուրաքանչյուր վճիռ: Եվ այսօր աննվազ կորով ու մտքի չխամրող պայծառություն ենք հայցում ձեզ համար Ամենակալից:

Մենք սովորել ենք հաստատակամ լինել քրիստոնեական ընթացքի ու մեր որոշումների մեջ, բայց միևնույն ժամանակ նաև հոգատար ու ողորմած այլոց հանդեպ: Եվ այսօր անբավ սեր ու անսպառ եռանդ ենք հայցում Ձեզ համար Բարձրյալից:

Սովորել ենք սիրել ու արժևորել այն վեհն ու անգինը, որ հանց սուրբ մասունքներ ունենք մեր ծնունդից մեզ վստահված` ընտանիք, ազգ, հայրենիք, եկեղեցի, դպրոց ու բանակ: Եվ այսօր աղոթում ենք Երկնավոր Հորը, որպեսզի Սուրբ Հոգու շնորհներն առավել պայծառությամբ ու առատությամբ շողան Ձերդ Սրբազնության հոգում՝ լուսավոր կանթեղ դառնալով նաև Ձեզ վստահված հոտի յուրաքանչյուր անդամի համար:

Սակայն, վստահաբար, դեռևս շատ ու շատ բաներ ունենք սովորելու Ձերդ Սրբազնությունից, ուստի այսօր աղաչում ենք Երկնային Քահանայապետին Ձեր քաջառողջության, երկար տարիների արևշատության, շնորհների առատության և առաջնորդական փոխանորդի գահի անսասանության համար: Թող որ Տիրոջ ամենախնամ ողորմածությամբ դեռ երկար տարիներ վայելենք Ձերդ սրբազնության հայրական քաղցր ներկայությունն ու խնամքը:

 

Որդիական խոնարհությամբ մատչիմք ի համբոյր Ձերդ Սրբազնութեան Սուրբ Աջոյն

Տեր Գրիգոր քհն. Գրիգորյան

Զորավոր Սուրբ Աստվածածին եկեղեցու հոգևոր հովիվ

 

18.09.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․