Հուլիսի 9-ին Զորավոր Ս. Աստվածածին եկեղեցու սիրիահայ համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, հոգևոր հովիվ Տեր Գրիգոր քահանա Գրիգորյանի առաջնորդությամբ և «Հանրային դիվանագիտություն» բարեգործական ՀԿ-ի հովանավորությամբ, ուխտագնացության մեկնեց Արագածոտնի թեմի սրբավայրեր:
Հարյուր հիսուն ուխտավորների ճանապարհի ուղեկիցներն էին աղոթքն ու շարականները: «Բարի է գոհաբանել Տիրոջը, սաղմոս երգել Քո անվանը, ո՛վ Բարձրյալ: Առավոտյան պատմել Քո ողորմությունը, և գիշերը՝ Քո ճշմարտությունը» (Սղմ. 91:1-4) փառաբանական սաղմոսն իրենց շուրթերին՝ նրանք հասան առաջին ուխտավայր՝ Մուղնիի Ս. Գևորգ եկեղեցի (13-րդ դ.), ուր մասնակից եղան Առավոտյան ժամերգության: Ապա եկեղեցու խորհրդակատար Տեր Գարեգին քահանա Արսենյանը հոգեհանգստյան արարողություն կատարեց, և ուխտավորներն աղոթք բարձրացրին առ Տեր Սիրիայում զոհված իրենց հայրենակիցների համար: Արարողության ավարտին Տ. Արեն վարդապետ Շահենյանը ուխտավորներին ներկայացրեց Ս. Գևորգ զորավարի վարքը, ապա բոլորն իրենց խոնարհումը բերեցին եկեղեցում ամփոփված Ս. Գևորգի մասունքներին՝ խնդրելով սրբի բարեխոսությունը Հայ եկեղեցու անսասանության համար: Այնուհետև Տեր Գրիգորը ջերմ ընդունելության համար շնորհակալություն հայտնեց եկեղեցու հոգևոր դասին՝ գլխավորությամբ թեմի առաջնորդ Տ. Մկրտիչ եպիսկոպոս Պռոշյանի:
Հաջորդ ուխտավայրը, որ սպասում էր իր ուխտավորներին, Օհանավան գյուղում, Քասաղ գետի կիրճի աջափնյա բարձրադիր սարավանդի եզրին գտնվող վանքն էր՝ Հովհաննավանքը, որի հիմնադիրը և առաջին վանահայրը, ըստ ավանդության, եղել է մեր առաջին հայրապետը՝ Ս. Գրիգոր Լուսավորիչը, որն այստեղ է բերել և թաղել Ս. Հովհաննես Մկրտչի մասունքները: Ուխտավորները Տեր Գրիգորի գլխավորությամբ Ճաշու ժամերգության մասնակցեցին, ապա «Հույսի միավոր» սիրիահայ տիկնանց օժանդակ միության երգչախումբը շարականներ կատարեց:
Այնուհետև սիրիահայ ուխտավորներն իրենց հանգիստն անցկացրին Աշտարակ ձորի «Արևիկ» հանգստյան գոտում: Մինչ սիրո ճաշը «Հույսի միավոր» սիրիահայ տիկնանց օժանդակ միության ատենապետուհի Զարուհի Ամալյանն իր շնորհակալական խոսքը հղեց Նավասարդ Սրբազանին, ում օրհնությամբ սիրիահայ համայնքը բազմաթիվ նախաձեռնություններ և ծրագրեր է իրականացնում, շնորհակալական խոսք հղեց նաև Զորավոր Ս. Աստվածածին եկեղեցու ողջ հոգևոր դասին՝ Տեր Գրիգորի գլխավորությամբ, ովքեր իրենց նախանձախնդիր ծառայությամբ նպաստում են իրենցից յուրաքանչյուրի հոգևոր աճին:
Սիրիայում ծագած պատերազմի պատճառով Հայաստան գաղթած բազմաթիվ սիրիահայեր այստեղ էլ՝ իրենց հայրենիքում, դեռ դժվարություններ են կրում, բայց նրանցից յուրաքանչյուրը, Աստծո ներկայությամբ հոգևոր ուրախություն ապրելով, չի դադարում հանապազօր փառաբանել Տիրոջը: Ս. Աթանաս Մեծն ասում է՝ ինչո՞ւ է անհրաժեշտ ամեն օր փառաբանել Տիրոջը, ապա պատասխանում է և ասում՝ մի՞թե ոչ նրա համար, որ Փրկիչը մեզ համար հարություն և կյանք պատրաստեց:
Կարինե Սուգիկյան
Զորավոր Սուրբ Աստվածածին եկեղեցի