Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը, եկեղեցու սոցիալական ծրագրերի շրջանակներում, օգոստոսի 23-ին այցելեց Նուբարաշենի Դ-1 թաղ. 7-րդ հողակտորում բնակվող Մարտիրոսյան ընտանիքին: Հինգ զավակներով հարուստ երիտասարդ ընտանիքը բնակվում է երկու սենյականոց տնակում, ուր հազիվ երեք մահճակալ և մեկ օրորոց է տեղավորվում: Տնակում տարվա մեծ մասը խոնավ է, քանի որ տանիքը կաթում է:
Բազմազավակ ընտանիքը ֆինանսական մեծ խնդիրներ ունի, քանի որ ընտանիքի հայրը՝ Մարտիրոսյան Սարգիսը (35 տ.), մշտական աշխատանք չունի, իսկ ընտանիքին հատկացվող ընտանեկան նպաստով չեն կարողանում հոգալ անգամ իրենց նվավազագույն կարիքները:
«Ամեն ամիս վճարելու պայմանով գնեցինք այս տնակը, բայց երբեմն չենք կարողանում այդ գումարն ու կոմունալ վարձերը վճարել, հնարավորություն չունենք տանիքը նորոգելու, հոսանք անցկացնելու և ճարահատյալ ուրիշի հոսանքի գծից ենք օգտվում: Մեր տնակը նաև գազաֆիկացված չէ, և ձմռանը փայտի վառարան ենք վառում»,- ասաց ընտանիքի մայրը՝ Գևորգյան Մարիամը (26 տ.):
Տեր Գրիգորը կարիքավոր ընտանիքին հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Ընտանիքի մայրն իր երախտագիտությունը հայտնեց Վարդանյան ընտանիքին՝ ուշադրության և աջակցության համար:
Քրիստոնեական առաքինություններից կարևորագույնը ողորմածությունն է, որն ազնվացնում է այն մարդու հոգին, ով, ինչպես Պողոս առաքյալն է ասում, ողորմում է հոժար սրտով և ոչ հարկադրաբար և տրտմությամբ, որովհետև Աստված սիրում է զվարթառատ տուրքը. «Եվ Աստված կարող է ամեն շնորհ շատացնել ձեր մեջ, որպեսզի ամեն ինչում ամենայն ժամ ամենայն բավականություն ստանալով՝ առատանաք բոլոր բարի գործերում» (Բ Կորնթ. 9:7-9): «Իսկ եթե դու,- ասում է Ս. Հովհան Ոսկեբերանը,- թեկուզ հազար քանքար տաս, բայց հպարտությամբ, ամբարտավանությամբ և փառասիրությամբ, կոչնչացնես ամեն ինչ նման այն փարիսեցու, ով թեև իր ունեցվածքից տասանորդ էր տալիս, բայց գոռոզանում և ամբարտավանում էր դրանով: Նա դուրս եկավ տաճարից՝ ամեն ինչ ոչնչացրած: Իսկ երբ ողորմում ես ուրախությամբ, մտածիր, որ դու ավելին ես ստանում, քան տալիս ես: Ուստի, թողնելով անտեղի հետաքրքրությունը, ողորմենք բոլոր կարիքավորներին, և անենք դա մեծ առատաձեռնությամբ, որպեսզի այն օրը՝ գալիք դատաստանին, ինքներս էլ արժանանանք Աստծո ողորմածությանն ու ներողամտությանը»:
Կարինե Սուգիկյան
Զորավոր Սուրբ Աստվածածին եկեղեցի