Գանգատվելու մասին

Մի անգամ երկու հարևան եկան իմաստունի մոտ և խնդրեցին իրենց վեճը լուծել:

- Ես ողջ ամառ իմ այգին մշակեցի, իսկ նրա այծը եկավ ու ամբողջ խաղողը կերավ,- գանգատվեց նրանցից մեկը:- Ի՞նչ անեմ հիմա, քանի որ առանց բերքի եմ մնացել:

- Ճի՞շտ է ասում,- հարցրեց իմաստունը մյուս հարևանին:

- Այո, ես ուշադրությունից բաց թողեցի կենդանուն և նա ուրիշի այգին մտավ,- պատասխանեց մարդը:

- Այդ դեպքում դու ես մեղավոր: Տուր նրան քո այծն ու պարտքդ մարած կլինես:

- Ես այդպես էլ կանեի,- պատասխանեց նա,- բայց այծս սատկեց՝ այդ խաղողն ուտելով ու թունավորվելով: Այնպես որ ես էլ պահանջում եմ, որ կենդանուս ինձ վերադարձնեն:

Նախքան մերձավորիդ դեմ գանգատվելը՝ մտածիր, արդյոք նա պատճառ չունի՞ ի պատասխան քո դեմ գանգատվելու:

Ռուսերենից թարգմանությունը՝ Էմիլիա Ապիցարյանի