Հրաշքների աշխարհը

Մի պատանի տրտում նստած էր ճամփեզրին, երբ մի ալեհեր ծերունի անցավ նրա մոտով: Տեսնելով պատանու երանազուրկ հայացքը՝ մոտեցավ նրան և հարցրեց.

- Տղա՛ս, ինչո՞վ կարող եմ օգնել քեզ:

Պատանին նայեց ծերունուն և պատասխանեց,

- Դժվար թե կարողանաս օգնել ինձ, ո՛վ ծերունի: Ես փնտրում եմ այն, ինչը երբեք ոչ ոք չի տեսել:

Ծերունին զարմացած հարցրեց,

- Մի՞թե քո ուզածը վեր է մտքից:

Տղան պատասխանեց.

- Ես փնտրում եմ հրաշքների աշխարհը: Շատ եմ մտածում դրա մասին, բայց երբեք չեմ գտնում, ուստի կարծում եմ այս աշխարհում այն գոյություն չունի:

Ծերունին լուռ նայեց տղայի դեմքին, խորհրդավոր ժպտաց, այնուհետև ասաց.

– Ես գիտեմ թե որտեղ է այն… Ե՛կ իմ ետևից:

Պատանին իսկույն վեր ցատկեց տեղից և սրտի թրթիռով հետևեց ծերունուն: Քայլերը նրանց մոտակա եկեղեցի տարան: Եկեղեցու խորհրդավոր կիսախավարի մեջ ծերունին, հերթով մատնացույց անելով սրբապատկերներն, ասաց.

– Նայի՛ր, տղա՛ս, այս նկարում պատկերված են առաքյալները, որոնք հրաշքով քարոզեցին մեր Տիրոջ ավետարանն ամբողջ աշխարհով: Այս մյուս պատկերում Սուրբ Աստվածածինն է, որը հրաշքով ծնվեց և հրաշքով ծնեց մեր Տեր Հիսուս Քրիստոսին: Իսկ այս խաչերը, որ տեսնում ես ամենուր պատկերված և փորագրված՝ վկայում են աշխարհի ամենամեծ հրաշքի՝ Հիսուս Քրիստոսի մասին, Ով խաչվեց հանուն մարդկային սերնդի փրկության, կործանեց դժոխքի դռները, և հարություն առավ մեռյալներից, այդպիսով դառնալով մարդկային ցեղի պատմության ամենամեծ հրաշքը:

Պատանին սկսեց մեղմիկ արտասվել և փառք տալ Աստծուն այն բանի համար, որ  երկրի վրա գտավ հրաշքների աշխարհը:

Հրաչյա Բեգլարյան