29 Սեպտեմբեր, Կիր
Սեպտեմբերի 5-ին Զորավոր Ս. Աստվածածին եկեղեցու բակում «Զորավոր» երիտասարդաց միությունը, «Եկեղեցին մենք ենք» ծրագրի շրջանակներում, անցկացրեց հոգևոր ինտելեկտուալ խաղ: Երիտասարդ միության անդամները միմյանց հետ մրցեցին «Հավատք», «Հույս» և «Լույս» անվանումները կրող թիմերով: Երիտասարդները պատրաստվել էին ինտելեկտուալ խաղին՝ վերընթերցելով Ղուկասի ավետարանը: Երեք փուլով անցկացված ինտելեկտուալ խաղի ընթացքում երիտասարդները ոչ միայն ստուգեցին տարիների ընթացքում ձեռք բերած իրենց ավետարանական գիտելիքները, այլ նաև ամրապնդեցին այն: Հետաքրքիր և թեժ մրցակցության արդյունքում առաջին տեղը զբաղեցրեց «Հավատք» թիմը՝ արժանանալով մրցանակի: Հոգևոր ինտելեկտուալ խաղին հետաքրքությամբ հետևում էին և իրենց գիտելիքներն ստուգում Զորավոր Ս. Աստվածածին եկեղեցի այցելողները:
Հոգեպես աճում և զորանում է այն քրիստոնյան, ով ամեն օր որպես ուղենիշ ունի ավետարանական պատգամները, որ իր կյանքի հիմքն են: Քրիստոնյան նա է, ով ջանում է իմանալ, թե ինչ է ուսուցանել Քրիստոս, թե ով է Քրիստոս և այդ ամենն առաջին հերթին սովորում է Ավետարանից, սովորում է ապրել Ավետարանի համաձայն: Ինչպես ասել են եկեղեցու հայրերը՝ Քրիստոս թաքնված է Ավետարանի պատվիրանների մեջ:
Կարինե Սուգիկյան
Զորավոր Սուրբ Աստվածածին եկեղեցի