Կիրակնօրյա դպրոցը նշեց Բուն բարեկենդանը

Այս տարի, Հայ Առաքելական Սուրբ եկեղեցու տոնացույցի համաձայն, փետրվարի 26-ին է նշվում Բուն բարեկենդանը: Հայոց հնագույն տոնն իր ողջ ուրախությամբ թափանցել էր նաև Զորավոր Ս. Աստվածածին եկեղեցու կիրակնօրյա դպրոց՝ հերթական դասը վերածելով ուրախ տոնախմբության: Երգն ու պարը, խաղերն ու հյուրասիրությունը հաջորդում էին միմյանց: Թե՛ մանկավարժ Սիրանուշ Գումրույանը և թե՛ երեխաները մեծ ջանասիրությամբ պատրաստվել էին տոնին: Փոքրիկները՝ տոնին բնորոշ կառնավալային հագուստներով, երգեցին «Գացեք տեսեք» ժողովրդական երգը, մեծ ոգևորությամբ մասնակից եղան խաղերին, պարեցին: Կիրակնօրյա դպրոցի սաներից Սամվելը Հովհաննես Թումանյանի «Բարեկենդան» հեքիաթը պատմելուց հետո ասաց. «Իրենք չգիտեին, բայց մենք գիտենք, որ բարեկենդանը մարդ չի, տոն է»: Մանկավարժը նշեց, որ երեխաները հեքիաթի շնորհիվ առնչվեցին բարությանը, ազնվությանը, ինչպես նաև՝ ստին: Երեխաները քաջատեղյակ էին, որ օրեր առաջ Հայ եկեղեցին նշել է Ս. Վարդանանց տոնը, որի պատմությունը ևս ներկայացրեցին՝ առանձնակի շեշտելով Հայոց սպարապետ Վարդան Մամիկոնյանի խիզախ կերպարը:

«Եկեղեցական տոները մեր հոգևոր կյանքի անբաժան մաս են կազմում, որոնցով արտահայտում ենք մեր հավատը, աստվածճանաչողությունը և աստվածապաշտությունը: Ուրախալի է, որ մեր կիրակնօրյա դպրոցի սաները, մանկավարժի գլխավորությամբ, մասնակից են դառնում տոներին՝ սովորելով փառաբանել Աստծուն Նրա շնորհած մեծամեծ բարիքների համար: Հայ եկեղեցին՝ իբրև սիրող մայր, իր զավակներին դաստիարակում է Աստծո խոսքի համաձայն՝ հետապնդելով մի նպատակ միայն` ուղղել նրանց քայլերը դեպի մեր Փրկիչը՝ Հիսուս Քրիստոս»,- ասաց Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը:

Կարինե Սուգիկյան