Մի ճանապարհորդ կողմնացույց է գնում և իրեն հանդիպած քահանային ասում.
- Աղոթեցի Աստծուն, որ ինձ հարավի ու արևելքի, հյուսիսի և արևմուտքի ճանապարհները ցույց տա, բայց այդպես էլ պատասխան չստացա և որոշեցի կողմնացույց գնել:
Քահանան ժպտում է և պատասխանում.
- Մի՞թե չնկատեցիր, որ Աստված արդեն պատասխանել է քեզ՝ իմաստության լույս արթնացնելով քո մտքում, որպեսզի կողմնացույց գնես և տարբեր ուղիները տեսնես:
Երբեմն մենք ինչ-որ նշաններ ենք փնտրում կամ մեր պատկերացումներին համապատասխան ենք Աստծուց պատասխաններ սպասում, սակայն Նա չի գործում այնպես, ինչպես մենք ենք ակնկալում և ցանկանում տեսնել, այլ մեր սրտում և մտքում հոգևոր արթնություն և իմաստություն է ծագեցնում, որպեսզի հասկանանք Իր պատասխանները և տեսնենք խնդիրների լուծումները:
Հովհաննես Մանուկյան
Զորավոր Սուրբ Աստվածածին եկեղեցի