Երեխաներն Աստծու պարգևն են, իսկ ծնողներն ու մանկավարժները՝ նրանց խնամակալներն ու դաստիարակները, կոչված են նպաստելու երեխաների հոգևոր աճին և զարգացմանը: Այս կարևորագույն նպատակին էր կոչված Զորավոր Ս. Աստվածածին եկեղեցու «Զորավոր» կիրակնօրյա դպրոցի հերթական ուխտագնացությունը: Հոկտեմբերի 5-ին դպրոցի սաները, նրանց ծնողներն ու մանկավարժ Տաթև Պետրոսյանը, եկեղեցու հոգևոր հովիվ Տեր Գրիգոր քահանա Գրիգորյանի առաջնորդությամբ, ուխտի մեկնեցին Արագածոտնի թեմի սրբավայրեր: Փոքրիկ ուխտավորները նախ եղան Ապարանի Սուրբ Խաչ եկեղեցում, մասնակցեցին Սուրբ Պատարագին և Սուրբ Հաղորդություն ստացան, ապա այցելեցին Բաշ-Ապարանի հերոսամարտի «Վերածնունդ» հուշահամալիր: Շարունակելով իրենց ընթացքը՝ ուխտավորները կանգ առան Աստվածընկալ վանքում, ուր Տեր Հոր գլխավորությամբ «Տերունական աղոթք»-ն ասացին, որից հետո Տեր Հոր հետ հետաքրքիր զրույց և սիրո ճաշ ունեցան: Ուրախ հանգիստը ոգևորել էր երեխաներին, քանի որ իրենց խաղերին էր միացել Տեր Գրիգորը: «Զորավոր» կիրակնօրյա դպրոցի սաները անմոռանալի և ուրախ տպավորություններով վերադարձան Երևան:
Մարդն արարվել է Աստծու պատկերով և նմանությամբ, և երեխայի մեջ այս կատարյալ պատկերի ամրապնդումը ծնողի և մանկավարժի հիմնական ու կարևորագույն պարտականություններից մեկն է: Երբ նպաստում են, որ երեխայի սրտում կենդանի մնա հավատը և Աստծու հանդեպ երկյուղը, ապա իր կյանքում նա անսասան կկանգնի ամուր ժայռի վրա և չի ցնցվի իր շուրջը մոլեգնած քամիներից՝ վստահ լինելով, որ իր գլխից մի մազ անգամ չի ընկնի առանց Աստծու կամքի: Փիլիսոփաներից Ցիցերոնը հետևյալ կարևորագույն միտքն է արտահայտել. «Հեռացրեք մարդկանցից Աստծու երկյուղը և աշխարհում կկործանվեն նվիրվածությունը, բարեկամությունն ու արդարությունը», իսկ Պլատոնը նշել է այն լավագույն ժառանգությունը, որ կարող ենք թողնել երեխային. «Անկասկած մարդկային հոգու լավագույն որակը Աստծու առաջ քայլելն է ամենայն ճշմարտությամբ և մաքրությամբ: Նա, ով հավատում է Աստծու գոյությանը, երբեք չի գործի անազնիվ արարք: Հետևաբար՝ մեր երեխաներին կարող ենք թողնել լավագույն ժառանգությունը՝ ոչ թե ոսկին, այլ խորը բարեպաշտությունը»:
Կարինե Սուգիկյան
Զորավոր Սուրբ Աստվածածին եկեղեցի