Մանուկների շուրթերով նորից երգեց Կոմիտասը

Զորավոր Սուրբ Աստվածածին եկեղեցում ԱՀԹ առաջնորդական փոխանորդ գերաշնորհ Տեր Նավասարդ արք. Կճոյանի հայրական օրհնությամբ արդեն մեկ տարի է, ինչ գործում է «Զորավոր մանկունք» երկսեռ երգչախումբը:

Նոյեմբերի 1-ին Սուրբ Պատարագից հետո ԱՀԹ առաջնորդարանի դահլիճում երգչախումբը Հայոց ցեղասպանության 100-րդ տարելիցին նվիրված ներկայացավ «Կոմիտասը մանուկների շուրթերով» գրական-երաժշտական կոմպոզիցիայով:

Մինչ երգչախմբի ելույթը, ներկաները Տեր Նավասարդ արք. Կճոյանի գլխավորությամբ «Տերունական աղոթք»-ն ասացին: Ապա Զորավոր Սուրբ Աստվածածին եկեղեցու հոգևոր հովիվ Տեր Գրիգոր քահանա Գրիգորյանը ներկայացրեց «Զորավոր մանկունք» երգչախմբի գործունեությունը՝ ի ուրախություն նշելով, որ սա երգչախմբի առաջին ելույթն է առաջնորդարանի դահլիճում, և Սրբազան Հոր օրհնությամբ երգչախումբը կշանուրանակի իր ելույթները նորանոր բեմերում:

Համերգին հրավիրված էր միջնադարյան երաժշտության մասնագետ, հայկական վիոլայի մենակատար, կոմպոզիտոր Գրիգոր Առաքելյանը:

Հայկական վիոլայի երաժշտության ներքո «Զարթիք փառք իմ» շարականի երգեցողությամբ երգչախումբն ազդարարեց ելույթի սկիզբը: «Զորավոր մանկունք» երգչախումբը գեղարվեստական ղեկավար Գոհար Հարությունյանի խմբավարությամբ ողջ ելույթին եռաձայն կատարեց Կոմիտաս վարդապետի մշակումներից հետևյալ շարականներն ու ժողովրդական երգերը՝ «Այսօր ձայն հայրական», «Քրիստոս ի մէջ մեր յայտնեցաւ», «Տեր ողորմեա», «Մեծացուսցէ», «Մեր դռանը խնկի ծառ», «Սոնա յար» և «Զար զընգը», իսկ կոմպոզիտոր Գրիգոր Առաքելյանի մշակումներից հնչեցրեց «Զարթիք փառք իմ» և «Խնկի ծառի նման ես» շարականները: Հանդիսատեսն ունկնդրեց ոչ միայն երեխաներին, այլ նաև երգչախմբի խմբավար Գոհար Հարությունյանի կատարմամբ Կոմիտասի «Օրորը», «Գարուն ա» և Գրիգոր Առաքելյանի մշակմամբ «Թագվորագովք» երգերը:

Երգեցողությանը զուգահեռ երգչախումբն ունկնդրին ներկայացրեց նաև Կոմիտաս վարդապետի ծննդյան և մանկության պատմությունը մինչև նրա Էջմիածնի Գևորգյան ճեմարան ընդունվելը:

«Զորավոր մանկունք» երգչախումբը «Կոմիտասը մանուկների շուրթերով» գրական-երաժշտական կոմպոզիցիան ավարտեց «Հայրապետական մաղթերգ»-ով: Դահլիճի ծափողջյունները վկայում էին, որ երգչախումբն իր կատարումներով կարողացել էր դիպչել ունկնդրի սրտին:

«Կոմիտաս վարդապետի կյանքը, արվեստը, մշակույթը, հոգին այսօր մեզ փոխանցվեց և մենք վերապրեցինք մեծ վարդապետին ևս մեկ անգամ մանկական շուրթերից ելած բանաստեղծություններով և երգերով՝ վայելելով նրա ջինջ կերպարի ներգործուն ուժը մեր մեջ»,- ասաց Սրբազան Հայրը և իր շնորհակալությունը հայտնեց Տեր Գրիգոր քահանա Գրիգորյանին, կոմպոզիտոր Գրիգոր Առաքելյանին, երգչախմբի գեղարվեստական ղեկավար և խմբավար Գոհար Հարությունյանին և երգչախմբի աննման փոքրիկներին՝ «Կոմիտաս» պատկերագիրքը նվիրելով նրանց: Սրբազան Հոր մաղթանքն էր «Զորավոր մանկունք»-ին, որ իրենց շնորհներն ավելի մեծ բեմերից հասանելի դարձնեն ավելի մեծ թվով ունկնդիրների՝ ի շահ մշակութային և մտավոր մտքի:

Ունկնդիրներից տիկին Ամալյային ցնցել էր երգչախմբի ելույթը, նա ուրախ է, որ իր 9-ամյա թոռնիկը՝ Ռազմիկը, այս երգչախմբում է երգում. «Այսօր ունկնդրեցինք գողտրիկ և գեղեցիկ երաժշտություն: Ցանկությունս է, որ առավել ընդլայնվի նորաստեղծ երգչախմբի ասպարեզը՝ հնարավորություն ընձեռելով հանդես գալու նաև օտարերկրյա բեմերում»:

Նկատելի էր նաև Արմինեի ոգևորությունը. նրա երկու զավակները երգում են «Զորավոր մանկունք» երգչախմբում: Նրանք երեք ամիս մեծ ուրախությամբ և սիրով հաճախել են երգչախմբի փորձերին: «Այս երգչախմբում երեխաներս ազգային և հոգևոր բարձր արժեքներին հաղորդակցվելու հնարավորություն ունեն»,- ասաց Արմինեն:

«Կոմիտասը մանուկների շուրթերով» գրական-երաժշտական կոմպոզիցիային ներկա էին նաև Հայաստանում հավատարմագրված Լեհաստանի դեսպանատան օտարերկրացի աշխատակիցները, ովքեր, ունկնդրելով երգչախմբի ելույթը, առաջարկություն հայտնեցին Սբ. Ծննդյան տոնին միասին ներկայանալ այն երգչախմբերի հետ, որ ժամանելու են Մերձբալթյան երկրներից:

Մանուկների շուրթերով նորից երգեց Կոմիտասը և մեծ բանաստեղծ Պարույր Սևակի խոսքով՝ նորից երգեց, մորմոքեց և կախարդեց Աստվածային Կոմիտասը՝ ամենամեծ նահատակը, ամենահայը և ամենահայրը:

Կարինե Սուգիկյան