22 Դեկտեմբեր, Հիսնակի Ե Կիրակի
Փետրվարի 7-ին Սուրբ Սարգսի տոնին նվիրված ցուցահանդես-մրցույթը մեկնարկեց Գ. Սունդուկյանի անվան Ազգային ակադեմիական թատրոնում: Այն կազմակերպվել է ՀՀ Մշակույթի նախարարության նախաձեռնությամբ և Հայաստանի պետական ֆիլհարմոնիայի աջակցությամբ: Մրցույթին մասնակցում են մինչև երեսունհինգ տարեկանները:
Մրցույթը մեկնարկեց Տերունական աղոթքով, ապա Արարատյան Հայրապետական թեմի Զորավոր Ս. Աստվածածին եկեղեցու խորհրդատակատար Տեր Վահան քահանա Առաքելյանը ներկաներին փոխանցեց Նավասարդ Սրբազանի օրհնությունը:
Բացման խոսքում Հայաստանի պետական ֆիլհարմոնիայի տնօրեն Գագիկ Մանասյանն ընդգծեց. «Միջոցառումները նպատակ ունեն ավելի ժողովրդական դարձնել Սուրբ Սարգսի տոնը: Մենք պետք է ունենանք մեր ազգայինը, պետք է մերն այնքան մասսայական ու ճանաչելի դառնա, որ յուրաքանչյուրը ցանկանա դրա մասը կազմել»:
Մշակույթի փոխնախարար Արև Սամուելյանը դիմելով մասնակիցներին հույս հայտնեց՝ նշելով. «Այստեղ են հայ մեծանուն նկարիչների անվանացանկը շարունակողները` ապագա Սարյանները, Այվազովսկիները և Գորկիները: Եվ ձեր աշխատանքները կջերմացնեն ոչ միայն մեր սրտերը, այլև այն հանդիսատեսի, ով կտեսնի և կգնահատի դրանք»:
Մասնակիցներից Արթուր Բարսեղյանը հայտնեց, որ պատրաստվում է նկարել Սուրբ Սարգսին, որով փորձելու է արտահայտել իր քրիստոնեական սերն Աստծո նկատմամբ: Ըստ նրա մեր այսօրվա երիտասարդները պետք է փորձեն ավելի շատ արժևորել մեր ազգայինը: Լուսինե Բաղդասարյանը հայտնեց, որ նկարելու է սիրահար զույգ, քանի որ Սուրբ Սարգիսը երիտասարդների և սիրո բարեխոսն է, ով ամենից առաջ ասոցացվում է հենց սիրահարների հետ:
Մասնակիցները մի քանի օր շարունակ հնարավորություն կունենան աշխատել իրենց ստեղծագործությունների վրա, որից հետո դրանք ամբողջական ցուցադրության կհանվեն:
Մրցույթի արդյունքները կամփոփվեն փետրվարի 10-ին, հաղթողները կպարգևատրվեն մրցանակներով:
Զորավոր Սուրբ Աստվածածին եկեղեցի