«Մենք ժպտում ենք ձեզ, դուք ժպտում եք աշխարհին»

Առողջ ապրելակերպի համար անչափ կարևոր է երեխային դեռևս փոքրուց սովորեցնել անհրաժեշտ հիգիենիկ հմտություններին: Առողջությունը մարդու ֆիզիկական և հոգեկան հատկանիշների ամբողջությունն է, որի պահպանմանը նպաստում է օրվա լավ կազմակերպված ռեժիմը, այդ թվում նաև ատամների խնամքը:

Փետրվարի 21-ին Հայ Առաքելական Սուրբ եկեղեցու Արարատյան Հայրապետական թեմի «Ցերեկային կենտրոն»-ում հենց այս նպատակն էին հետապնդում Հայկական Կարմիր խաչ ընկերության երիտասարդական բաժնի աշխատակիցներն ու կամավորները: Նրանք նախադպրոցական և դպրոցական տարիքի թվով երեսուն երեխաների հետ, «Առողջ ապրելակերպ»-ի շրջանակներում, «Բերանի խոռոչի հիգիենա» թեմայով կրթա-տեղեկատվական դասընթաց անցկացրեցին:  

Ծրագրի բացումը «Տերունական աղոթք»-ով սկսեց ԱՀԹ «Ցերեկային կենտրոն»-ի հոգևոր հովիվ Տեր Գրիգոր քահանա Գրիգորյանը: Տեր Հայրը երեխաներին փոխանցեց Արարատյան Հայրապետական թեմի առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի հայրական օրհնությունը: Ապա զրուցեց նրանց հետ Հայկական Կարմիր խաչ ընկերության մասին: Այնուհետև Տեր Գրիգորը իր շնորհակալությունը հայտնեց Հայկական Կարմիր խաչ ընկերությանը, որը «ՄԻԱՎ-ի կանխարգելումը Հայաստանում» ծրագրի շրջանակներում ԱՀԹ «Ցերեկային կենտրոն»-ի շահառուներին աջակցում է սոցիալապես՝ տրամադրելով նրանց սննդի և հիգիենիկ պարագաների փաթեթներ:

Միջոցառման կարգախոսն էր՝ «Մենք  ժպտում ենք ձեզ, դուք ժպտում  եք  աշխարհին»:

Դասընթացը վարում էր ծրագրի կրթական մասով պատասխանատու, բժիշկ-ստոմատոլոգ Եսթեր Չոբանյանը: Նա երեխաներին մանրամասնորեն և մատչելի ներկայացնում էր բերանի խոռոչի խնամքի հիմնական կանոններին, ատամի խոզանակի և մածուկի ճիշտ ընտրությունից մինչև ատամնաբույժի մոտ այցելության հաճախականությունը: Այնուհետև երեխաները այդ մասին մուլտֆիլմ դիտեցին:

Ծրագիրը նպատակ ուներ բերանի խոռոչի հիգիենայի վերաբերյալ տեղեկատվությամբ նվազեցնել բերանի խոռոչի հիվանդությունները:

Ծրագրի ավարտից հետո երեխաները պրակտիկ օրինակով ներկայացրեցին իրենց ստացած գիտելիքները:

Հայկական Կարմիր խաչ ընկերության երիտասարդական բաժնի աշխատակիցներն ու կամավորները վերջում երեխաներին նվիրեցին հիգիենիկ պարագաներ: Ծրագրին ներկա մի քանի ծնողների ևս հետաքրքրել էր դասընթացը, ուստի «Ցերեկային կենտրոն»-ի կողմից առաջարկություն եղավ մեծահասակների համար ևս նման դասընթաց կազմակերպել:

Ծնողներից Էդգարը գոհ էր ծրագրից. «Մատչելի և հասանելի ձևով երեխաներին մատուցվեց ինֆորմացիան, որ հետագայում իր դրական ազդեցությունը կունենա երեխաների առողջ ապրելակերպի վրա»,- ասաց նա: Դասընթացին մասնակցում էին նրա երկու երեխաները:

««Ցերեկային կենտրոն»-ի հետ մեր համագործակցության ընթացքում նմանատիպ ծրագիր առաջին անգամ ենք իրականացնում: Մենք սովորաբար սոցիալական կոմպոնենտով ենք աջակցում կենտրոնին, այս անգամ որոշեցինք կրթական կոմպոնենտով հանդես գալ, քանի որ Կարմիր խաչի երիտասարդական բաժինը՝ իր աշխատակիցներով և կամավորներով, երեխաների հետ աշխատելու բավականին փորձ ունի: Եսթերը ինքն էր կազմել շնորհանդեսը, նրան աջակցել էր ծրագրի հոգեբան Աննա Ավագյանը և մյուս աշխատակիցներն ու կամավորները: Ես էլ փորձել էի կոորդինացնել աշխատանքը: Այսօրվա շնորհանդեսը բոլորիս միահամուռ աշխատանքն էր: Մեզ շատ է ոգևորել երեխաների արձագանքը, նրանց հարցերի տարափը»,- ասաց Հայկական Կարմիր խաչ ընկերության երիտասարդական բաժնի աշխատակցուհի Սոնա Գևորգյանը: Ապա հավելեց նաև, որ ծրագիրը լինելու է շարունակական:

Վերջում «Ցերեկային կենտրոն»-ի հոգևոր հովիվ Տեր Գրիգոր քահանա Գրիգորյանը մեկ անգամ ևս իր շնորհակալական խոսքը հղեց Հայկական Կարմիր խաչ ընկերությանը, նրա երիտասարդական բաժնի աշխատակիցներին, կամավորներին, իսկ երեխաներն իրենց գոհունակությունն ու շնորհակալությունն արտահայտեցին ծափողջյուններով: Տեր Հայրը Արարատյան Հայրապետական թեմի առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի կողմից ևս նվերներ փոխանցեց երեխաներին:

Կարինե Սուգիկյան