«Մեր գթասրտությունը մեզ համար թող հայելի լինի»

Արարիչն Աստված սիրո և ողորմության աղբյուր է և Նրա որդիներն Իրենց ողորմած Հոր նմանողությամբ փորձում են իրենց միջավայրի համար դառնալ սիրո և ողորմության աղբյուր: Ինչը, որ սիրում է մարդը և ինչին, որ անդրադառնում է, այն էլ գտնում, երկրայինը սիրողը երկրայինն ու անցողիկն է գտնում, իսկ երկնայինը սիրողը՝ երկնայինն ու մնայունը: Երկնային և մնայուն արժեքների հանդեպ սերն է, որ Զորավոր Ս. Աստվածածին եկեղեցու համայնքի անդամներին և անհատ բարերաներին մղում է կյանքի կոչելու համայնքի համար կարևորագույն սոցիալական ծրագրերը:

Հերթական անգամ՝օգոստոսի 16-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Սարգսյան Գայանեին (52 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Արմեն Չալդրանյանը: Տիկին Գայանեն իր որդու՝ 1-ին խմբի զինհաշմանդամ Դավիթ Սարգսյանի (21 տ.) հետ բնակվում է Արցախի 14/17 հասցեում: Երկու տարի առաջ Դավիթը զինծառայության ընթացքում դժբախտ պատահարի արդյունքում ստացել է ողնուղեղի սալջարդ, ինչի հետևանքով զրկվել է քայլելու կարողությունից: «Այժմ տղաս դեռևս չգործող Մխիթար Հերացու անվան Երևանի պետական բժշկական համալսարանի թիվ 1 հիվանդանոցային համալիրի «Զինվորական հաշմանդամների և վիրավոր զինվորների աջակցության» կենտրոնում կամավորության սկզբունքով աշխատող բժիշկների ջանադիր և նախանձախնդիր աշխատանքի շնորհիվ կոմպլեքս բուժում է ստանում: Ծանր ապրումների պատճառով անցյալ տարի ամուսինս ինֆարկտից մահացավ»,- ասաց տիկին Գայանեն: Ընտանիքի մայրն ի վիճակի չէ աշխատելու, քանի որ զբաղված է որդու խնամքով և ընտանիքի կարիքները մասամբ հոգում է Դավիթի զինհաշմանդության գումարով: Սարգսյան ընտանիքը բնակվում է վարձակալությամբ, և զինհաշմանդամի մայրն ասաց, որ ԱՄՆ-ից մի բարերար հանձն է առել վճարելու իրենց տան վարձը: Տիկին Գայանեն անչափ շնորհակալ էր Զորավոր Ս. Աստվածածին եկեղեցու համայնքից, Տեր Գրիգորից և աջակից անձից՝ ուշադրության և հոգատարության համար:

«Տալիս եմ քեզ հետևյալ պատվիրանը, ով եղբայր, քեզ մոտ թող միշտ առաջնային լինի ողորմությունը, մինչև որ մեր մեջ զգանք այն ողորմածությունը, ինչպիսին Աստված ունի աշխարհի հանդեպ: Մեր գթասրտությունը մեզ համար թող հայելի լինի, որպեսզի նրանում ինքներս մեր մեջ տեսնենք Աստծո էության նմանությունը և ճշմարիտ կերպարը: Այս նմանությամբ լուսավորվենք, որպեսզի սթափ կամեցողությամբ ջանանք կենցաղավարել աստվածահաճո կերպով» (Իսահակ Ասորի):

Կարինե Սուգիկյան