Ուխտագնացություն՝ հանուն Հայոց աշխարհի խաղաղության

Ամեն մի ուխտագնացություն ուխտավորի առջև նոր հոգևոր հորիզոններ և պատուհաններ է բացում դեպի հոգևոր աշխարհ տանող:

Հուլիսի 31-ին վաղ առավոտյան Զորավոր Սբ. Աստվածածին եկեղեցու համայնքը, սպասավոր Վաչագան սարկավագ Դոխոլյանի գլխավորությամբ, եկեղեցում միասնաբար աղոթելուց հետո մեկնեց ուխտագնացության Գավառի Սբ. Աստվածածին և Սբ. Կարապետ եկեղեցիներ, Այրիվանք, Վանեվանի և Մաքենյաց վանքեր: Թվով երեսուն ուխտավորների հոգևոր ընթացքն ուղղված էր Հայոց երկրի խաղաղությանը:

Առաջին ուխտավայրը, ուր կանգ առավ համայնքը, դա Գավառի Սբ. Կարապետ եկեղեցին էր, ուր նրանք Սբ. Գրիգոր Նարեկացու «Մատյան Ողբերգություն»-ից աղոթքներ կարդացին, շարականներ երգեցին՝ հոգևոր երգերն եզրափակելով «Տեր ողորմեա»-ով: Ապա Գավառի առաջնորդանիստ Սբ. Աստվածածին եկեղեցում մասնակից եղան Սուրբ և Անմահ Պատարագին: Պատարագիչն էր եկեղեցու խորհրդակատար Տեր Գնել քահանա Մարտիրոսյանը, ով քարոզին անդրադարձավ աստվածատուր խաղաղությանը՝ մասնավորաբար նշելով, որ խաղաղության պակասը նախ և առաջ սիրո և աղոթքի պակասն է, որը հնարավոր է վերակագնել միայն սիրով լեցուն գործերով և աստվածահաճո աղոթքներով:

Սբ. Պատարագի ավարտին ուխտավորները սիրո ճաշ ունեցան և մեկնեցին Մաքենյաց վանք, որի գլխավոր Սբ. Աստվածածին եկեղեցում նրանք մասնակցեցին Երեկոյան ժամերգությանը: Ապա, շարունակելով իրենց ուխտուղին, եղան վերոնշյալ մյուս սրբավայրերում՝ Հանգստյան ժամերգությանն էլ մասնակից լինելով Այրիվանքում:

«Ուխտագնացությունը մարմնի պահեցողության մի կերպ է և աղոթք: Քաղաքի աղմուկը խանգարում է մեզ պահպանելու հոգևոր արթնությունը, և ուխտագնացությունն այն վերականգնելու հիանալի մի միջոց է՝ այս սրբավայրերում և բնության մեջ առավել մոտ լինելով Աստծուն: Ուխտագնացությամբ քրիստոնյա հավատացյալը, դժվարությունները հաղթահարելով, իր աղոթքն է բարձրացնում առ Աստված այն սրբավայրերում, ուր սրբերի մասունքներ կան, կամ էլ դարեր շարունակ աղոթքներ են հնչել: Աղոթքի ճանապարհին դժվարություններ հաղթահարելը ցույց է տալիս մեր պատրաստակամությունը՝ ուղղված մեր ուխտի կատարմանը՝ հոգու ու մարմնի, ինչպես նաև մեր երկրի խաղաղության հաստատմանը: Մեր անձերի դեպի կատարելություն գնալը, մեր իրականությունն էլ կատարյալ կդարձնի»,- ասաց Վաչագան սարկավագը:

Հոգևոր ճամփորդության հոգենորոգ օրն ավարտվեց, և յուրաքանչյուր ուխտավորի ամենամեծ փափագն էր, որ աստվածային Սերը և խաղաղությունը թափանցի բոլորի հոգիներից ներս՝ լուսավորելով Արդարության Արեգակի անսպառ Լույսով:

Կարինե Սուգիկյան