Պատասխանատվություն, որին կոչված է քրիստոնյան

Քրիստոսի արյամբ փրկագնված յուրաքանչյուր քրիստոնյա կենդանի Աստծու տաճար է (Բ Կորնթ. 6:17): Քրիստոնյայի համար կարևորագույն խնդիր է իր տաճարը հանապազ մաքրել «մարմնական և հոգեկան ամեն պղծությունից՝ ապրելով Աստծու երկյուղով» (Բ Կորնթ. 7:1): Այսինքն՝ քրիստոնյային պետք է հատուկ լինի այն, ինչ հատուկ է Աստծուն. Աստված գթասիրտ է, նա էլ պետք է գթասիրտ լինի, Աստված սեր է, նա էլ պետք է սիրող սիրտ ունենա, Աստված սուրբ է, նա էլ պետք է ձգտի սրբության: Ս. Հովհան Ոսկեբերանի խոսքով, որպեսզի հավատավորը մաքրի իր սիրտն ու միտքն այն ամենից, ինչ պիղծ է, բավական է գիտակցի, որ Աստծու ներկայությունը ոչ մի անմաքուր բան չի կարող տանել: Այսինքն՝ Աստծու ներկայությամբ ապրող քրիստոնյան, որպես Աստծու տաճար և Աստծու սիրելի զավակ, մեծ պատասխանատվության է կոչված: 

Այս պատասխանատվությունն ունեցող քրիստոնյան է ջանում աստվածանման լինել և աստվածային սիրո լույսը տարածել: Ապրիլի 27-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը, որպես սիրո և երախտագիտության արտահայտություն, Գրիգորյան Հրայրին (25 տ.) փոխանցեց 100 000 դրամ, որ տրամադրել էր Զորավոր Ս. Աստվածածին եկեղեցու համայնքի անդամ Արման Աբրահամյանը: Հրայրն իր մայրիկի, քրոջ, երեք եղբայրների, տատիկի ու պապիկի հետ բնակվում է Ասկերանի շրջանի Նորագյուղ գյուղում: Հրայրի եղբայրը՝ Գրիգորյան Հարությունը (28 տ.)՝ որպես պայմանագրային զինծառայող, այս տարի՝ մարտի 24-ին,  մասնակցել է Ասկերանի շրջանի Փառուխ գյուղում տեղի ունեցած ռազմական գործողություններին և ողնուղեղի բեկորային վնասվածք ստացել: Արդեն մեկ ամիս է, ինչ Հարությունը «Էրեբունի» ԲԿ-ի վերակենդանացման բաժանմունքում բուժում է ստանում: Զինծառայողի ընտանիքն իր երախտագիտությունը հայտնեց Տեր Գրիգորին և աջակից անձին:

Կարինե Սուգիկյան