Սեպտեմբերի 2-ին Զորավոր Սբ. Աստվածածին եկեղեցու համայնքի հերթական տնայցը, հոգևոր հովիվ Տեր Գրիգոր քահանա Գրիգորյանի գլխավորությամբ, մեծ ուրախություն էր պատճառել էջմիածնաբնակ Ղազարյան ընտանիքին: Բաղրամյան փող. 20/14 հասցեում վարձակալությամբ է բնակվում չորս հոգուց բաղկացած ընտանիքը, որ սոցիալապես անապահով վիճակում է հայտնվել, քանի որ ընտանիքի մայրը՝ Ղազարյան Ռուզանը (34 տ.) միայնակ է խնամում իր երեք զավակներին և առողջական խնդիրների պատճառով ի վիճակի չէ աշխատելու: Ռուզանի համար ամենամեծ մտահոգությունն իր մեծ որդու՝ Բոգդանի (11 տ.) տեսողության հետ կապված խնդիրն է: Նա նշեց, որ հիմնավոր բուժման համար այն գումարը չունեն, որով հնարավոր կլիներ կանխել Բոգդանի տեսողության օր-օրի աճող թուլացումը:
Ընտանիքի հետ զրույցից հետո Տեր Հայրը բժշկության աղոթք կարդաց և նրանց հանձնեց ամերիկաբնակ Կարեն Վարդանյանի կողմից տրամադրած դրամական օգնությունը (100 ԱՄՆ դոլար): Ռուզանն իր երախտագիտությունը հայտնեց Տեր Գրիգորին, աջակից անձին և համայնքին:
Աստվածային սերը մարդու հանդեպ անվերջ զոհաբերվող սերն է: Եվ աստվածային սերը մարդու մեջ գործում է ոչ այլ կերպ, քան զոհաբերվող սիրով: Իրական զոհաբերությունն իր մեջ և՛ սխրանք, և՛ ջանքեր է կրում: Եկեղեցու հայրերից մեկն ասել է. «Սերը կյանք է, ուրախություն, իսկ սիրո գինը զոհաբերությունն է»:
Աբբա Դորոթեոսը ողորմության առաքինության մասին հորդորում է. «Պետք է ողորմել հանուն բարության, հանուն մեկս մյուսի հանդեպ կարեկցանքի և այդպես գոհացնել ուրիշներին, կարծես թե մենք կընդունեինք նրանցից ծառայություններ, տալ այնպես, կարծես թե մենք ենք ստանում: Եվ սա է ողջամիտ ողորմությունը, այսպես մենք հասնում ենք որդու աստիճանին»:
Կարինե Սուգիկյան
Զորավոր Սուրբ Աստվածածին եկեղեցի