Սիրիահայերի մասնակցությունը մայիսյան ժամերգություններին

ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, Զորավոր Սբ. Աստվածածին եկեղեցու սիրիահայ համայնքը հոգևոր հովիվ Տեր Գրիգոր քահանա Գրիգորյանի գլխավորությամբ, իրենց ավանդույթին հավատարիմ, մուտք գործեց մայիսյան ժամերգությունների շրջան: Յուրաքանչյուր սիրիահայի համար մայիս ամիսը սիրելի է և սպասելի՝ որպես մայիսյան ժամերգությունների մի ընթացք, որ նվիրված է Սբ. Մարիամ Աստվածածնին:

Մայիս ամսվա յուրաքանչյուր չորեքշաբթի օրը Զորավոր Սբ. Աստվածածին եկեղեցում երեկոյան ժամերգությունն անցկացվում է՝ ըստ մայիսյան ժամերգության կարգի: Արարողությանը հատուկ սաղմոսներին, մաղթանքներին, քարոզներին, շարականներին և օրվան նվիրված աղոթքներին սիրիահայերը հետևում են մայիսյան ժամերգության համառոտ ժամագրքից: Մայիսի 11-ի հերթական ընդհանրական աղոթքն անցկացվեց Զորավոր Սբ. Աստվածածին եկեղեցու խորհրդակատար Տեր Հայկազուն քահանա Մկրտչյանի և Սիրիայից Հայաստան ժամանած Տեր Հայկազ քահանա Մասոյանի գլխավորությամբ: Տերունական աղոթքից հետո ներկաները բարձրաձայն ընթերցեցին սաղմոսներ, երգեցին Աստվածամորը նվիրված «Մեծածուսցէ» շարականները, իսկ Աստվածամորը նվիրված քարոզին բոլորի միասնական խնդրանքն էր՝ Մայր սուրբ բարեխօսեա՜, յիշեա՜ Տէր և ողորմեա: Ապա տվյալ օրվա Սբ. Հովհաննես Գառնեցու Տիրամորն ուղղված բարեխոսական աղոթքով ժամերգության մասնակիցների շուրթերից ի խորոց սրտի հնչեց՝ Աստուածածին, Քրիստոսի մայր և Հօր միածնին ծնողը, անէծքները վերացնող և մարդկային ցեղին պարծանքը: Երկնային զօրքերու կողմէ երանուած, եւ հողեղէններէն օրհնուած, մարդոց եւ Աստուծոյ միջեւ միջնորդ, արարածներուն հաշտարարը, կոյսերուն թագն ու պսակը, համարձակօրէն բարեխոսէ՛ ինծի և մեղաւորներուն համար:

Ժամերգությանը քարոզխոսեց Տեր Հայկազ քահանա Մասոյանը՝ անդրադառնալով օրվա ընթերցմանը Մարկոսի Ավետարանից, որ վերաբերում էր մեռելների հարությանը, հանդերձյալ կյանքին և կարևորագույն պատվիրաններին (Մարկոս 12:18-35): Ի ամփոփումն քարոզի՝ Տեր Հայրը կարևորեց այն հանգամանքը, որ եթե հարության գաղափարն ու Աստծո խոսքը չշաղվի և չդառնա մեր կյանքի անբաժանելի մասը, ապա զուր են այս խոսքերը, քանի որ Քրիստոսը՝ սիրո թագավորը, փրկության հույս շնորհեց բոլորին՝ անկախ ազգային պատկանելությունից:

«Տեր ողորմեա» շարականով և «Տերունական աղոթք»-ով ավարտվեց սիրիահայ համայնքի մայիսյան հերթական ժամերգությունը:

«Մայիսյան ժամերգությունները Սիրիայում ապրող հայ համայնքային կյանքում երկար տարիների պատմություն է ունեցել: Մայիս ամսին որոշ աղջիկներ ու կանայք ուխտ էին անում և Աստվածամոր նմանողությամբ ողջ ամիս կապույտ զգեստ և սպիտակ գոտի էին կրում: Մայիսյան ժամերգության օրերին եկեղեցու Խորանն ու ատյանն առանձնանում էին ծաղիկների առատությամբ, քանի որ ժամերգության մասնակիցների մեծ մասը իրենց հետ ծաղիկներ էին բերում»,- ասաց Զորավոր Սբ. Աստվածածին եկեղեցու սպասավոր Րաֆֆի սրկ. Գույումջյանը, ով հինգ տարեկանից ծառայել է Հալեպի Սբ. Աստվածածին եկեղեցում:

Մայիսյան ժամերգությանը մասնակից Շողիկ Առաքելյանի համար ընդհանրական աղոթքը մի նոր աշխարհ, նոր կյանք ու հոգևոր հանգստություն է, և նա իր աղոթքներում մշտապես դիմում է Աստվածամոր բարեխոսությանը:

Կարինե Սուգիկյան