Տեառընդառաջի նախատոնակին

Փետրվարի 13-ին ինչպես բոլոր եկեղեցիներում, այնպես էլ Զորավոր Սբ. Աստվածածին եկեղեցում կատարվեց հանդիսավոր ժամերգություն: Այդ արարողությունից հետո տեղի ունեցավ նախատոնակ և անդաստան: Ժամերգության ընթացքում հնչեցին տոնին համապատասխան աղոթքներ, շարականներ: Իսկ անդաստանի արարողությամբ օրհնվեց աշխարհի չորս կողմերը: Խորհրդակատար Տեր Զենոն քահանա Բարսեղյանը նշեց, որ Տեառընդառաջի նախատոնակով մուտք ենք գործում դեպի տոն և գնում ենք դեպի Տիրոջն ընդառաջ:

Ժամերգության ավարտից հետո եկեղեցական թափորը «Քրիստոս փառաց թագաւոր» տաղի երգեցողությամբ Զորավոր Սբ. Աստվածածին եկեղեցու բակում վառեց Տեառընդառաջի խարույկը: Տեր Զենոնը ներկայացրեց կրակի խորհուրդը. «Սբ. Հովհաննեսն իր ավետարանում վկայում է ճշմարիտ Լույսի՝ Քրիստոսի մասին. «Բանն էր ճշմարիտ Լույսը, որ աշխարհ գալով լուսավորում է ամբողջ մարդկությունը» (Հովհաննես 1:10): Մեր Տերն ասաց. «Ես աշխարհ եկա որպես լույս, որպեսզի ով որ Ինձ հավատա, խավարում չմնա» (Հովհաննես 12:46): Այս կրակը Քրիստոսի Լույսն է խորհրդանշում: Այս լույսով լուսավորենք մեր տները, մեր հոգիները՝ փարատելով մեղքի խավարը»:

Տեառընդառաջի ավանդական խարույկի շուրջ պարեցին Կենտրոն վարչական շրջանի Պատանեկան ստեղծագործության և գեղագիտական դաստիարակության կենտրոնի «Արմենիա» պարային համույթը և Քրիստափոր Քուշնարյանի անվան արվեստի դպրոցի սաները:

Զորավոր Սուրբ Աստվածածին եկեղեցու «Զորավոր» երիտասարդաց միության անդամ 17-ամյա Մարիամ Պիվազյանի համար տոնը պատգամում է միշտ հաճախել եկեղեցի: Իսկ Քրիստոսի Լույսով նա փորձելու է լուսավորել իր սիրտը, իր տունը և իրեն շրջապատող ամեն ինչ:

Նորապսակներից Աննան և Մխիթարը նույնպես մասնակցում էին Տեառընդառաջի տոնակատարությանը: «Այս օրը մեր ընտանիքի ամրության համար մեծ խորհուրդ ունի: Ցանկանում ենք նաև մասնակացել Տեառնընդառաջի Սուրբ Պատարագին և նորապսակների օրհնության կարգին»,- ասաց Աննան:

Փետրվարի 14-ին կմատուցվի տոնական Սուրբ Պատարագ, որի ավարտին կկատարվի Ն.Ս.Օ.Տ.Տ. Գարեգին Բ Ամենայն հայոց կաթողիկոսի կողմից հռչակված նորապսակների օրհնության կարգ:

Կարինե Սուգիկյան