Ընդառաջ գնալով կարիքավորին՝ ընդառաջ ենք գնում Տիրոջը

Փետրվարի 14-ին Հայ եկեղեցին տոնախմբեց Տեառընդառաջը, իսկ տոնն իր կարևորագույն պատգամն է հղում բոլորին՝ ընդառաջ գնալ մեզ ընդառաջող Տիրոջը: Տոնի պատգամին ընդառաջ՝ Զորավոր Սուրբ Աստվածածին եկեղեցու համայնքը հոգևոր հովիվ Տեր Գրիգոր քահանա Գրիգորյանի գլխավորությամբ սոցիալական ծրագրերի շրջանակներում շարունակում է իր այցերն անապահով ընտանիքներին:

«Տիրոջն ընդառաջ գնալ, այսինքն՝ ապրել Տիրոջ հետ երանելի հանդիպման բերկրանքը, որ կարող է տեղի ունենալ ամենուր՝ հիվանդանոցներում, ծերանոցներում, մանկատներում, փողոցներում, երբ մարդ արարածն օգնության ձեռք է մեկնում իր նմանին՝ նրա մեջ իր սիրելի Աստծուն տեսնելով: Այս հանդիպումը տեղի է ունենում կարիքավոր ընտանիքներին օգնելիս, դժվարին իրավիճակում հայտնվածին չանտեսելիս, քո նմանին սիրով ու բարությամբ վերաբերվելիս»,- ասաց Տեր Գրիգորը:

Անապահով ընտանիքներից համայնքն այս անգամ այցելեց Մալաթիա-Սեբաստիա թաղամասի Շրջանային 2/5 հասցեում ապրող ընտանիքին: Առանց պատուհանների, փայտի վառարանով ջեռուցվող և անմխիթար վիճակում գտնվող երկու սենյականոց տանը վարձակալությամբ բնակվում են ընտանիքի հինգ անդամները՝ Ղուկասյան Գայանեն, որ միայնակ է խնամում իր երեք երեխաներին և նրա 80-ամյա մայրը: Ծայրահեղ վատ վիճակում հայտնված ընտանիքը գոյատևում է ծեր կնոջ թոշակի և երեխաների նպաստների շնորհիվ: Երեք զավակների մայրը նշեց, որ բոլոր խնդիրները քիչ թե շատ կհաղթահարվեին, եթե չլիներ իր ավագ զավակի առողջական խնդիրները: 12-ամյա Խաչատրյան Մարտինը հինգ տարեկանից տառապում է գլխուղեղի քրոնիկ հիվանդությամբ՝ էպիլեպսիայով, իսկ երկու տարի առաջ երեխայի մոտ հայտնաբերվել է գլխի ուռուցք, որի պատճառով աստիճանաբար նվազում է երեխայի տեսողությունը: Բոլոր խնդիրների առկայությամբ ընտանիքն ի վիճակի չէ լուծել երեխայի բուժման խնդիրները:

Ընտանիքի հետ զրույցից հետո՝ Տեր Գրիգորը բժշկության աղոթք կարդաց և ընտանիքին հանձնեց դրամական օգնություն, սննդի փաթեթներ, հիգիենայի և անկողնային պարագաներ: Ղուկասյան Գայանեն իր շնորհակալությունը հայտնեց Տեր Գրիգորին և եկեղեցու համայնքին իրենց օգնության ձեռք մեկնելու համար:

«Երանի նրան, ով մտածում է աղքատի և տնանկի մասին, փորձանքի օրը Տերը կփրկի նրան: Տերը կփրկի ու կպահպանի նրան, երանելի կդարձնի երկրի երեսին» (Սաղմոս 40:2-3):

Կարինե Սուգիկյան