Հոկտեմբերի 28-ին, Զորավոր Սբ. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարադ արք. Կճոյանի օրհնությամբ և հոգևոր հովիվ Տեր Գրիգոր քահանա Գրիգորյանի գլխավորությամբ, այցելեց Հույսի ավանի 2-րդ թաղամասի 4/99 հասցեում բնակվող Չիլինգարյան ընտանքին: 52-ամյա Ագապի Չիլինգարյանը միայնակ է խնամում իր երեք զավակներին: Տասնհինգ տարի առաջ նրա ամուսինը մեկնել է Ռուսաստան` արտագնա աշխատանքի և անհետ կորել: Այդ ընթացքում Չիլինգարյան ընտանիքը զրկվել է գրավ դրված իրենց բնակարանից, այնուհետև ապրել է վարձակալությամբ և միայն տասը տարի է, որ բնակվում է Հույսի ավանում՝ «Դիակոնիա» բարեգործական հիմնադրամի կողմից տրամադրած բնակարանում: Կարիքավոր ընտանիքն այլևս ընտանեկան նպաստ չի ստանում, քանի որ երեք զավակները չափահաս են: Տիկին Ագապիի երկու որդիներից առայժմ միայն մեկն է աշխատում, իսկ աղջիկն ուսանում է Երևանի Խ. Աբովյանի անվան հայկական պետական մանկավարժական համալսարանի կուլտուրայի ֆակուլտետի փողային-էստրադային վճարովի բաժնում:
Տեր Գրիգորը բժշկության աղոթք կարդաց և ընտանիքին հանձնեց դրամական օգնություն (100 ԱՄՆ դոլար), որ տրամադրել էր մոսկվաբնակ Կարինա Համբարձումովան՝ ի հիշատակ իր վաղամեռիկ որդու՝ Դավիթ Համբարձումովի:
«Քրիստոսի ողջ երկրային ուղին սիրո պատվիրանի վկայությունը եղավ մեզ համար: Աստվածորդին աշխարհին սիրո մի նոր տեսակ բերեց՝ անմնացորդ նվիրում ու զոհողություն պահանջող սեր: Յուրաքանչյուրին հատուկ է սիրելու կարողությունը և արդարացի է, որ մենք՝ որպես Երկնավոր Հոր զավակներ և ժառանգորդներ, մեր անսահման վստահությունը, անկեղծ սերը, հարգանքն ու ակնածանքը տածենք մեզ Սիրող Հոր հանդեպ: Եթե սիրո պատվիրանի համաձայն՝ Տիրոջն ու մերձավորին չսիրենք անհատույց սիրով, ապա սերը մեր մեջ կկորցնի իր աստվածային բնույթը և կվերածվի անձնասիրության»,- ասաց Տեր Գրիգորը:
Կարինե Սուգիկյան
Զորավոր Սուրբ Աստվածածին եկեղեցի