Գրքեր

«Զորավոր արանց» միության ուխտի ուղին

Հունիսի 21-ին Զորավոր Ս. Աստվածածին եկեղեցու «Զորավոր արանց» միությունը ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ ուխտի մեկնեց Հայաստանի նշանավոր ուխտավայրերից մեկը՝ Ծաղկեվանք: Արայի լեռան մի այրի մեջ գտնվող այս սրբավայրում, որտեղ ըստ ավանդության գտնվում է Վառվառա կույսի գերեզմանը, ուխտավորները, սրբուհու բարեխոսությունը հայցելով, միասնական աղոթք բարձրացրին առ Տեր Հայաստան ու Արցախ աշխարհների անսասանության և խաղաղության համար: 

Այնուհետև սիրո ճաշի ընթացքում Տեր Գրիգորն ուխտավորների հետ զրույցում ասաց, որ երբ քրիստոնյան թույլ է տալիս Աստծուն դիպչել իր սրտին, դադարում է անհանգիստ ու մոլորված լինելուց, դադարում է կյանքն անիմաստ վատնելուց ու երկրի երեսին մտացածին գանձեր փնտրելուց, քանի որ Քրիստոսի համբարձումը մահվանից հետո Աստծուն միավորվելու հնարավորության ապացույցն է. «Թեև քրիստոնյայի անցնելիք ճանապարհը նեղ է և անձուկ (Մատթ. 7:14), սակայն միակ ճանապարհն է, որ առաջնորդում է դեպի հավիտենական կյանք: Մեզ՝ քրիստոնյաներիս, չի վախեցնում դժվարին ճանապարհը, քանի որ այն միայնակ չենք անցնում, այլ Փրկչի հետ: Որքան էլ փորձություններով ու տառապանքով լեցուն լինի այդ ճանապարհը, որքան էլ դժվարությունների հանդիպենք, թեկուզ և կյանքի գնով անցնենք այդ ճանապարհը, պիտի հիշենք, որ պսակը հարությունն ու համբարձումն է: Դա այն հզոր հավատն ու հույսն է, որ ոչ ոք չի կարող խլել մեզանից»:
Ուխտի ուղին ուխտավորներին մի քանի ժամով կտրեց առօրյա հոգսերից՝ նրանց սրտի հայացքն ուղղելով դեպի Երկինք, ուր Քրիստոս համբարձվելով՝ Իր հետևորդների առջև լայն բաց արեց դրախտի դռները: «Վերջին ժամանակներում մարդկանց կփրկեն սերը, խոնարհությունը և բարությունը: Բարությունը կբացի դրախտի դռները, խոնարհությունը կտանի այնտեղ, իսկ սերը ցույց կտա Աստծուն»,- ասել է Ուղղափառ եկեղեցու հայրերից Գաբրիել Ուրգեբաձեն: 

 

Կարինե Սուգիկյան

 

22.06.22
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․