«Զորավոր» երիտասարդաց միությունը հաղորդ դարձավ Կարմիր Ավետարանի զորությանը

Ապրիլի 30-ին, ըստ Հայ եկեղեցու տոնացույցի, Ս. Զատկին հաջորդող Հինանց շրջանի երրորդ՝ Կարմիր կիրակին էր: Այն իր այլաբանական բացատրությամբ խորհրդանշում է Քրիստոսի արյամբ ծաղկած կիրակի և Նրա արյամբ հաստատված եկեղեցի: Գունագեղ կիրակիներից երրորդն ամեն տարի բազմաթիվ ուխտավորների է առաջնորդում դեպի Հովհաննավանք՝ մասնակից ու հաղորդակից դարձնելու ուխտի Ս. Պատարագին և Կարմիր Ավետարանի զորությանը: Ավանդույթի համաձայն՝ այս օրը Հովհաննավանք է բերվում Կարմիր Ավետարանը, որը պահվում է երևանաբնակ Կարապետյանների տանը: Ընտանիքը Սուրբ Գիրքը ժառանգել է Մշո Սուրբ Առաքելոց եկեղեցու վանական Կարապետ պապից: 

Հովհաննավանք ժամանած ուխտավորների թվում էին նաև Զորավոր Ս. Աստվածածին եկեղեցու «Զորավոր» երիտասարդաց միությունը: Մինչ ուխտի ճանապարհ անցնելը երիտասարդները Զորավոր Ս. Աստվածածին եկեղեցում մասնակից եղան Ս. Պատարագին: Հանուն Հայաստան և Արցախ աշխարհի զորացմանն էր ուղղված երիտասարդաց միության հերթական ուխտի ուղին: Սրբավայրում երիտասարդները սբ. Հովհաննես Մկրտչի բարեխոսությունը հայցեցին և փառաբանեցին Տիրոջը, որ արժանացրեց իրենց հաղորդ դառնալու միջնադարյան սրբավայրի և հրաշագործ Ավետարանի զորությանը: Հովհաննավանքի հոգևոր հովիվ Տեր Արամ քահանա Ասատրյանը մաղթեց ուխտավորներին, որ Տերն ի կատար ածի նրանց ուխտը և ասաց. «Ուխտ անել՝ նախ և առաջ նշանակում է հանդիպել Աստծուն, իսկ Ավետարանի խոսքին ու զորությանը հաղորդ դառնալ՝ նշանակում է Աստծու ներկայությանը հաղորդ դառնալ, քանի որ Աստված մեզ Իրեն հայտնում է Ավետարանի միջոցով»:

Կարմիր գույնի խորհրդանիշներին անդրադառնալով՝ տեղեկանում ենք, որ այն ոչ միայն հաղթանակի, այլ նաև պայքարի խորհրդանիշն ունի: Կարմիր կիրակին Քրիստոսի հետևորդներին սուրբգրային հետևյալ հորդորն է ուղղում. «Ի վերջո, զորացե՛ք Տիրոջով և Նրա ամենակարող զորությամբ: Ձեզ վրա առեք Աստծու սպառազինությունը, որպեսզի կարողանաք դեմ կանգնել սատանայի հնարքներին, որովհետև մեր պատերազմը մարդկանց դեմ չէ, այլ երկնքի տակ գտնվող չար ոգիների, իշխանությունների ու պետությունների և այս խավար աշխարհի տիրակալների» (Եփես. 6:10-13): Ըստ սբ. Հովհան Ոսկեբերանի՝ զորանալ Տիրոջով, այսինքն՝  հույս ունենալ Տիրոջ և Նրա օգնության վրա. «Տերը շատ պատգամներ տվեց և միաժամանակ ասաց՝ մի՛ վախեցիր, հուսա՛ առ Աստված և Նա օգնական կլինի քեզ: Եթե հնարավորություն կա հաղթելու, ապա ինչո՞ւ խուսափել պայքարից: Մինչև պայքարի վերջը զգոն եղիր և կհաղթես: Եվ մի զարմացիր, որ այդքան շատ է խոսվում թշնամու ուժի մասին: Այդ մասին իմացությունը չպետք է վախեցնի քեզ, այլ պաշտպանի անզգուշությունից՝ չար օրը չարի հարվածները հետ մղելու համար»:

Կարինե Սուգիկյան