Զորավոր Ս. Աստվածածին եկեղեցու ուխտի նվիրական օրերից մեկը

Մայիսի 14-ին Երևանի Զորավոր Ս. Աստվածածին եկեղեցի ուխտի եկած հավատացյալների փափագն էր մասնակցել ուխտի Սուրբ Պատարագին և հաղորդակից լինել «Զորավոր» հրաշագործ Ավետարանին՝ հայցելով սբ. Մովսես Գ Տաթևացի հայրապետի բարեխոսությունը:

14-րդ դարից առ այսօր Հայոց ազգը հաղորդակից է լինում իր զորությամբ և հրաշագործությամբ հայտնի «Զորավոր» Ավետարանին, որ նախկինում «Վիշապկենց» է կոչվել: Այս դարերի ընթացքում Ավետարանը հանգրվանել է Երևանի Երկուերեսնի և Զորավոր Ս. Աստվածածին եկեղեցիներում, Արտազի Ս. Թադեի վանքում, ապա՝ Ս. Էջմիածնում, իսկ 1939-ից՝ Մաշտոցյան Մատենադարանում: 73 տարվա դադարից հետո արդեն իններորդ տարին է, որ հավատավոր հայորդին տարվա մեջ մեկ օր՝ մայիսի 14-ին՝ սբ. Մովսես Գ Տաթևացի հայրապետի (1629-1632թթ.) մահվան հիշատակության օրը, հնարավորություն ունի հաղորդակցվելու «Զորավոր» Ավետարանի օրհնությանը Զորավոր Ս. Աստվածածին եկեղեցում:

Ուխտի նվիրական օրվա առթիվ, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, Երևանի Մեսրոպ Մաշտոցի անվան Մատենադարանից Զորավոր Ս. Աստվածածին եկեղեցի բերվեց «Զորավոր» Ավետարանը: Մինչև Ս. Պատարագի սկիզբը, եկեղեցու հոգևոր դասը և մեծ թվով ուխտավորներ եկեղեցու արևելյան մուտքից հանդիսավոր թափորով դիմավորեցին «Զորավոր» Ավետարանը: Թափորը, հոգևոր հովիվ Տեր Գրիգոր քահանա Գրիգորյանի գլխավորությամբ, «Զորավոր» Ավետարանը բերելու հատուկ արարողակարգով, մուտք գործեց եկեղեցի, որտեղ և շարունակվեց արարողակարգը: 

Ուխտի Ս. Պատարագը մատուցեց Զորավոր Ս. Աստվածածին եկեղեցու խորհրդակատար Տեր Վահան քահանա Առաքելյանը: Մինչ քարոզը, Տեր Հայրը հոգևոր դասի և համայնքի անունից շնորհակալություն հայտնեց ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանին, ում հայրական օրհնությամբ հավատավոր հայորդիները տարվա մեջ մեկ անգամ իրենց խոնարհումն ու երկրպագությունն են բերում «Զորավոր» Ավետարանին: Քարոզին Տեր Հայրն անդրադարձավ նաև խնդրակատար և հրաշագործ Ավետարանի զորությանն ու մասնավորաբար ասաց. «Զորավոր Ավետարանը նշանավոր է ոչ թե իր գեղագիտական արժեքով, այլ նախ և առաջ ավետարան լինելով և իր հրաշագործ զորությամբ: Այն շնորհաշատ մի պարգև է մեզ՝ մահկանացուներիս, որպեսզի Աստծու օրհնությանը հաղորդակից լինենք: Կարևորելով մեր Տեր և Փրկիչ Հիսուս Քրիստոսի Ավետարանը՝ մենք հաղորդ ենք դառնում Լույսին և մերժում ենք խավարը: Երբ Աստծու խոսքերը կյանքի են կոչվում, կյանքը գեղեցկանում և լուսավորվում է, որովհետև ավետարանական ոչ մի միտք և խոսք ի վնաս մարդու չեն, այլ նպատակ են հետապնդում մարդուն փրկություն պարգևել, ազատագրել մեղքերից, մարդկանց միջից վերացնել թշնամական խորհուրդները և սեր տարածել մարդկանց միջև»:

Ս. Պատարագի ավարտից մինչև Երեկոյան ժամերգությունը Զորավոր Ս. Աստվածածին եկեղեցի ուխտի եկած բազմաթիվ հավատացյալներ, սբ. Մովսես Գ Տաթևացի հայրապետի բարեխոսությամբ, հաղորդակից եղան կեսհազարամյա զորավոր պատմությամբ հայտնի «Զորավոր» Ավետարանին: 

«Սուրբ Ավետարանը կարելի է նմանեցնել հայելու, որում մեզանից յուրաքանչյուրը, եթե ցանկանա, կտեսնի իր հոգու վիճակը և այն ամենակարող բժշկությունը, որն առաջարկում է ամենակարող Բժիշկը՝ Աստված»,- ասել է Ռուս եկեղեցու հայրերից սբ. Իգնատիոս Բրյանչանինովը:

Այն անձը, որն ակնածանքով կարդում է Սուրբ Գիրքը և խոնարհաբար հնազանդվում աստվածային պատգամներին ու պատվիրաններին, լուսավորվում է Աստծու խոսքով և սնում է իր սիրտը՝ ինչպես երկնային մանանայով: «Երանի՜ նրանց, որոնք լսում են Աստծո խոսքը և գործադրում այն» ​​(Ղուկաս 11:28),- ասել է մեր Տերը՝ Հիսուս Քրիստոս: Այսպիսով, Աստծու խոսքին հնազանդ անձն ընթանում է փրկության ճանապարհով և երկրային կյանքի ավարտին,  Տիրոջ խոստման համաձայն, հուսալու է, որ ժառանգելու է հավիտենական կյանքը։ Տերն ասում է. «Լա՛վ իմացեք, ով որ լսում է Իմ խոսքը և հավատում Նրան, Ով Ինձ ուղարկեց, հավիտենական կյանք ունի և չի դատապարտվի, որովհետև նա արդեն իսկ մահից անցել է դեպի կյանք» (Հովհ. 5։24)։

Կարինե Սուգիկյան