Պատասխան – Ոչ միայն մարմնի, այլև հոգու ախտերն են բժշկում ու դևերին անարգում: Ահա նույն Սուրբ Հովհան Ոսկեբերանի վկայությունը. «Եթե ձեզանից մեկը տանջվի հոգու վհատությամբ, մարմնական ախտերով, հարստահարություններով, կենցաղային վշտերով, մեղքերի բեռներով, թող հավատով դիմի Սրբերի նշխարներին և այդ ամենից ձերբազատվելով` խնդությամբ կհեռանա այդտեղից և նշխարները տեսնելով միայն առավելագույնս կթեթևացնի իր խիղճը» (Տե՛ս Սուրբ Իգնատիոսին նվիրված ներբողը):

Դևերին հալածելու և անարգելու մասին նույն վարդապետն այսպիսի օրինակով է վկայում. «Զորօրինակ, երբ ավազակապետերն ու գերեզմաններ թալանողները տեսնում են վայր ընկած արքունական զենքեր` զրահ, ասպար կամ ամբողջովին ոսկեփայլ սաղավարտներ, երկնչում են ու չեն համարձակվում մոտենալ ու շոշափել` փախչելով անասելի վտանգից և երբեք չհանդգնելով կատարել այդ արարքը: Այսպիսին են նաև դևերը, որ ճշմարիտ ավազակապետերի նման, ուր տեսնում են հանգուցյալ մարտիրոսների մարմիններ, անմիջապես կրունկ են դարձնում ու խուճապահար փախչում»: