Ամուսնալուծության մասին

 «Եվ փարիսեցիները, մոտենալով Նրան, փորձեցին և ասացին.  «Օրինավո՞ր է, որ մեկն իր կնոջը արձակի ամեն մի հանցանքի պատճառով»: Նա պատասխանեց նրանց և ասաց. «Դուք չէ՞ք կարդացել, թե Նա, Ով սկզբից ստեղծեց, արու և էգ արեց նրանց և ասաց. դրա համար տղամարդը պիտի թողնի հորը և մորը ու պիտի գնա իր կնոջ հետևից. և երկուսը մեկ մարմին պիտի լինեն: Ապա ուրեմն` ոչ թե երկու, այլ մեկ մարմին են: Արդ, ինչ որ Աստված միացրեց, մարդը թող չբաժանի: …Սակայն ասում եմ ձեզ, թե ով իր կնոջն արձակում է, և դա պոռնկության պատճառով չէ, և ուրիշին է առնում, շնանում է. շնանում է և նա, ով արձակվածին է առնում»» (Մատթ. 19.3-9):

Այսպիսին էր Քրիստոսի պատասխանը փարիսեցիներին: Եվ կարծես մեր Տիրոջ խոսքն այսօրվա մասին է, որովհետև այսօր  տեսնում ենք, որ ոչ ընդունելի պատճառներով ամուսնալուծվում են երիտասարդ զույգերը շատ կարճ ժամանակահատվածում` երկու, երեք տարի հետո: Այսպես չպետք է լինի: Հատկապես, եթե եկեղեցով են ամուսնացած  և Աստված է նրանց միավորել, և Սուրբ Գիրքն ասում է. <<Ինչ որ Աստված միացրեց, մարդը թող չբաժանի>>: Ի՞նչ է նշանակում` այր և կին, մեկ մարմին: Աստված զույգին միավորել է անքակտելի, անխզելի կապանքներով. նրանց միտքը, սրտերը, մարմիններն է միավորել, նրանց կամքը, զգայարաններն ամբողջությամբ է միավորել և ոչ ոք իրավունք չունի բաժանելու  դա: Քանզի ինչպես Քրիստոսն է եկեղեցուն միավորված, այնպես էլ տղամարդն է կնոջը միավորված, որովհետև Քրիստոս Իր անսահման սիրով է միավորված եկեղեցուն, այսինքն` հավատացյալներին: Եվ այսօրվա Ավետարանն ասում է, որ <<տղամարդը պիտի թողնի հորը և մորը ու պիտի գնա իր կնոջ հետևից. և երկուսը մեկ մարմին պիտի լինեն>>, որովհետև մեկ պորտ ենք հաշվում հորն ու մորը զավակի հետ, բայց տղամարդու և կնոջ միջև որևէ սերնդային հարաբերություն չկա: Եվ ինչպես Քրիստոս Հորը թողեց Երկնքում և իջավ երկիր մեզ համար, և մորը թողեց խաչի առջև, որովհետև մայրը` Աստվածածին Մարիամը, խաչի առջև ծնկած աղոթք էր անում իր Որդու համար, ով մեռնում էր խաչի վրա: Բայց Քրիստոս Իր մոր աղերսանքն ու թախանձագին արտասուքը անտեսեց, իջավ դժոխք Իր հարսին` եկեղեցուն փրկելու: Եվ այդպես, Քրիստոս միավորվեց Իր հարսի հետ, դարձավ մեկ: Ճիշտ այդպես էլ, այր և կին մեկ մարմին: Եվ որքան սարսափելի և զարհուրելի է, երբ մեկն ուզում է մարդուն հավատքից շեղել և Քրիստոսից հեռացնել, որովհետև Քրիստոսի արյամբ գնված եկեղեցին միավորված է Տիրոջ հետ, և ով ուզում է մեկին հավատքից, Քրիստոսից հեռացնել, ուրանալ տալ իր հավատքը, սարսափելի մեղք է գործում: Ճիշտ այդպես էլ, ով կնոջը ամուսնուց հեռացնում է և ուզում է ընտանիքը բաժանել, ամենասարսափելի մեղքերից մեկն է գործում: Ինչ որ Աստված է միավորել, մարդը երբեք չի կարող բաժանել: Բաժանումը կլինի այն պարագայում, երբ զույգերից մեկը մահանա: Այս դեպքում կինը կամ ամուսինը կարող է կրկին ամուսնանալ աստվածային օրհնությամբ, բայց միայն երկրորդ անգամ և ոչ երբեք երրորդ կամ չորրորդ անգամ: Եվ ինչպես հոգին է մարմնի հետ միավորված, և եթե հոգու և մարմնի միավորությունը բաժանում է գտնում, այսինքն` հոգին մարմնից դուրս է գալիս, ապա մարմինը մեռնում է: Ճիշտ այդպես էլ, ամուսինն ու կինը  անքակտելի միությամբ են միավորված և նրանց բաժանողը մարդասպան է համարվում, ինչպես հոգին մարմնից բաժանող մարդն է մարդասպան: Ուրեմն, ոչ ոք իրավունք չունի մարմինը հոգուց բաժանել, այնպես էլ կնոջը ամուսնուց բաժանել: Այս բոլորը շատ լավ գիտակցենք և մեր սրտերում դնենք, երկյուղ ունենանք Տիրոջից: Հնում այսպես չէր. մեր պապերն ու տատերը վախ ունեին Աստծուց և երբեք չէին բաժանվում: Այսօր Աստծու վախն է պակասել, հեշտությամբ բաժանվում են և նոր ընտանիք կազմում, որը սխալ է, որովհետև ուրիշի դժբախտության վրա հնարավոր չէ երջանկություն կերտել. որբ երեխաներ թողնելով հնարավոր չէ հարազատ որդիներ ունենալ: Խորթ է այդ երկրորդ ամուսնությունը և Սուրբ Գիրքն ասում է, թե` <<ով իր կնոջն արձակում է, և դա պոռնկության պատճառով չէ, և ուրիշին է առնում, շնանում է. շնանում է և նա, ով արձակվածին է առնում>>: Հիշենք այս բոլոր պատվիրանները, փորձենք մեր կյանքում իրագործել և Աստված թող շնորհ և ողորմություն անի, որ մեր հայ ժողովուրդը, մեր հայրենիքը ամուր, կայուն ընտանիքներ ունենա, որ դարերով է ունեցել և հայ ազգը առանձնահատուկ է եղել այդ իմաստով, որ հավատարիմ են եղել այր և կին միմյանց մինչև մահ, երբեք չեն բաժանվել: Ցավոք սրտի, այսօր թշնամու խաբկանքով, արևմտյան, եվրոպական երկրների չար մտադրություններով բաժանվում են մեր երիտասարդ ընտանիքները: Այսպես չպետք է լինի, ամեն մեկս պետք է քաջ գիտակցենք, որ սրբություն է ընտանիքը և որևէ մեկը Աստծու միավորածը չպետք է բաժանի: Տիրոջ շնորհը, սերը, ողորմությունը լինի ձեզ հետ: Ամեն:

Տեր Միքայել վարդապետ Գևորգյան