«Առատորեն սերմանողն առատորեն էլ կհնձի»

Սբ. Պողոս առաքյալի վերոնշյալ խոսքով առատ բերքն ու առատ պարգևն անխուսափելի է առատ սերմանողից. կարիքի մեջ գտնվողին ձեռք մեկնողը, սովորաբար, ավելին է ստանում, քան տվել էր: Ապա առաքյալն ասում է. «Աստված սիրում է նրան, ով նվիրում է սրտի հոժարությամբ և զվարթառատ կերպով և կարո՛ղ է ամեն պարգև առատորեն տալ ձեզ, որպեսզի միշտ էլ ունենաք այնքան, որքան բավարար կլիներ ձեր բոլոր կարիքներին և կավելանար՝ ամեն տեսակ բարի գործերի հատկացվելու համար» (Բ Կորնթ. 9:6-9):

Փետրվարի 19-ին, սրտի հոժարությամբ և զվարթառատ կերպով օգնելու մեծ ցանկությամբ, Զորավոր Սբ. Աստվածածին եկեղեցու համայնքը՝ հոգևոր հովիվ Տեր Գրիգոր քահանա Գրիգորյանի գլխավորությամբ, իր հերթական այցն ունեցավ Հաղթանակ գյուղի 7-րդ փողոցի 56 հասցեում բնակվող բազմազավակ անապահով ընտանիքին: Վեց անդամներից բաղկացած ընտանիքում ապրում են տատիկը ՝ 52-ամյա Բաղրամյան Մարգարիտան, նրա դուստրը՝ 30-ամյա Սիմոնյան Անուշը, ով միայնակ է խնամում իր չորս զավակներին: Ընտանիքն ապրում է միայն նպաստով:

Տեր Գրիգորն ընտանիքին հանձնեց համայնքի կողմից պատրաստած սննդի փաթեթներ և հիգիենայի պարագաներ, ապա՝ բժշկության աղոթք կարդաց: Այցն ուրախություն էր պատճառել այս ընտանիքին, նրանք իրենց գոհունակությունը հայտնեցին Տեր Հորն ու Զորավոր Սբ. Աստվածածին եկեղեցու համայնքին:

Կարինե Սուգիկյան