Հոկտեմբերի 5-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանն այցելեց Նոր Նորքի 2-րդ զանգվածի Մոլդովական 29/4 28 հասցեում բնակվող Նավասարդյան ընտանիքին: Կարիքավոր ընտանիքի չորս անդամները հաշմանդամ են: Ընտանիքի հայրը՝ տան միակ աշխատողը, մահացել է հինգ ամիս առաջ: Նավասարդյան ընտանիքը բնակվում է հանրակացարանի տարրական պայմաններից զուրկ մեկ սենյականոց բնակարանում և ի վիճակի չէ անգամ փոխել պատուհանի ապակին, որ կոտրվել է մի քանի տարի առաջ: Ընտանիքի մայրը՝ Նավասարդյան Սվետլանան (60 տ.), նշեց, որ բազմիցս դիմել է թաղապետարան՝ պատուհանը փոխելու, տունը վերանորոգելու հարցով, բայց մնացել է անպատասխան: Ընտանիքի երեք զավակներից երկուսը՝ Մարիամը (17 տ.) և Գոռը (24 տ.), սովորում են Էջմիածնի գիշերօթիկ դպրոցում:
Տեր Գրիգորը բժշկության աղոթք կարդաց և ընտանիքին հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Տիկին Սվետլանան անչափ շնորհակալ էր աջակից Վարդանյան ընտանիքին:
Եկեղեցու հայրերից Սիմեոն Աթոսացին նշում է, որ Տերն այնքան է տալիս, որքան մարդուն անհրաժեշտ է և նաև նրա համար, որ մարդը կարողանա բարին գործել: Մահացու մեղքերից ագահության հետևանքների մասին Հայր Պաիսիոս Աթոսացին ասել է, որ նա, ով նյութական մեծ բարիք է ձեռքբերում, բայց չի փառաբանում Աստծուն ստացածի համար և չի տեսնում իր մերձավորի դժբախտությունը, նա նյութական բարիքի հետ միասին նաև մեծ խնդիրներ է ձեռքբերում: Ուստի Հայր Պաիսիոսը հորդորում է. «Ջանանք, ինչ էլ որ անենք, անենք հանուն Քրիստոսի: Սիրենք մարդուն, այսինքն՝ կիսենք նրա ցավը, ով դժվարության մեջ է: Ուշադիր լինենք, որ մեր գործողություններում չլինեն ինքնահաճություն և շահամոլություն: Հիշենք, որ Քրիստոս տեսնում և հետևում է մեզ, ձգտենք չտրտմեցնել Նրան»:
Կարինե Սուգիկյան
Զորավոր Սուրբ Աստվածածին եկեղեցի