Չար ոգին երկուսիդ էլ տիրում է

- Տեսե՛ք, մի պատմություն պատմեմ ձեզ,- ասաց հայր Պորֆիրոսը։

Մի միանձնուհի, որ ամեն բանում ձգտում էր կարգուկանոնի, բարկությամբ ասաց իր խոստովանահորը․

- Այսինչ քույրը բարկացնում է բոլորին իր դժվարություններով ու բնավորությամբ։ Չենք կարողանում համբերել նրան․․․

Այդժամ ծերը պատասխանեց․

- Ախր դու նրանից վատն ես․․․

Սկզբում միանձնուհին զարմացավ ու սկսեց հակաճառել, սակայն ծերի բացատրությունից հետո հասկացավ ու գոհ մնաց։

Ծերը նրան ասաց․

- Նա չար ոգու տիրապետության տակ է, և այդ է պատճառը, որ իրեն վատ է պահում։ Դու կարծես թե ավելի լավ վիճակում ես գտնվում, բայց նա քեզ էլ է տիրել և երկուսիդ էլ խաղացնում է մատների վրա։ Այդ քույրն իր կամքով չէ, որ նման վիճակում է գտնվում։

Իսկ դու քո սեփական կամքով, քո ընդդիմությամբ և սիրո բացակայությամբ նույնն ես անում։ Այդպիսով դու և՛ նրան օգուտ չես բերում, և՛ քեզ ես վնասում։ Ուստի դու ավելի վատն ես։

Հայր Պորֆիրիոս Կավսոկալիվացի

Ռուսերենից թարգմանեց Էմիլիա Ապիցարյանը