«Ինչը օգտակար է մեզ համար, այն է ցանկանում Աստված, իսկ ի՞նչ է ցանկանում Աստված, այն, որ ապրենք Նրա պատվիրանների համաձայն: Սակայն շատերը, խույս տալով պատվիրաններից, չեն կարողանում ընդունել օգտակարն ու Աստծո կամքը, այդ պատճառով էլ չեն կարողանում մոտենալ առաքինության սխրանքներին»,- ասել է Ս. Հովհան Ոսկեբերանը: Աստծո ծառայությանը նվիրված անձը, ըստ Պողոս առաքյալի, չպետք է ընդօրինակի այս աշխարհի մարդկանց վարմունքը, այլ պետք է լինի նոր մարդ նորոգված մտքերով, որպեսզի իմանալով Աստծո կամքը, իր փորձառությամբ ընտրի լավը, այսինքն՝ ինչ որ բարի է, ինչ որ ընդունելի է Նրան և կատարյալ (Հռոմեացիներ 12:2):
Քրիստոսահիմն եկեղեցու համայնքները համայնքային կյանքից ներս աստվածճանաչողությամբ և իրենց փորձառությամբ ընտրել են բարին արարելու աստվածահաճո ընթացքը: Սեպտեմբերի 18-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը Մեխակյան Արմինեին (49 տ.) հանձնեց դրամական օգնություն (50 000 դրամ), որ տրամադրել էր համայնքի անդամ Անի Բաղդասարյանը: Արմինեն իր մայրիկի, եղբոր և քրոջ հետ բնակվում է Նոր Նորքի 7-րդ զանգվածի 10/30 հասցեում: Նա 2-րդ կարգի հաշմանդամ է, ութ տարի առաջ ավտովթարի է ենթարկվել և վնասել ոտքը, երկու վիրահատություններից հետո նրա ոտքի վիճակն ավելի է վատացել: «Թե՛ ես և թե՛ եղբայրս արդեն մի քանի տարի է, ինչ աշխատանք ենք փնտրում: Լրագրողի և իրավաբանի մասնագիտություններն ունենալով՝ չեմ կարողանում այնպիսի աշխատանք գտնել, որը չպահանջի ֆիզիկական լարվածություն: Բայց առողջությունս թույլ է տալիս և ի վիճակի եմ տանից թարգմանչական և գրաֆիկական դիզայնի աշխատանքներ կատարել: Հայրիկիս և իմ վիրահատությունների պատճառով մեր տունը գրավ դրեցինք և քույրս՝ մեր ընտանիքի միակ աշխատողը, վարկեր է վերցրել, որպեսզի կարողանանք վճարել մեր պարտքերը»,- ասաց Արմինեն՝ իր գոհունակությունը հայտնելով Տեր Գրիգորին և աջակից անձին:
Կարինե Սուգիկյան
Զորավոր Սուրբ Աստվածածին եկեղեցի